ԴԻՄՈՒՄ ԳՐԵՔ ԿՈՒՏԱԿԱՅԻՆԻ ՊԱՐՏԱԴԻՐ ԲԱՂԱԴՐԻՉԻՆ ՉՄԱՍՆԱԿՑԵԼՈՒ ՀԱՄԱՐ` ԵԹԵ ԿԱՐՈՂ ԵՔ Մ. Խ. Երեկ երկրորդ ընթերցմամբ քվեարկվեց եւ ընդամենը 67 կողմով ընդունվեց «Կուտակային կենսաթոշակի մասին» օրենքի այն փոփոխությունը, որով կուտակման պարտադիր բաղադրիչը փաստորեն կամավոր է դառնում, եթե աշխատակիցը դիմում գրի գործատուին, որ չի ուզում մասնակցել կուտակային համակարգին: Սա ըստ պարտադիր բաղադրիչի ակտիվ ընդդիմախոս ՀՅԴ-ական Արծվիկ Մինասյանի` էական առաջընաց է: Ամբողջ խնդիրն այն է, որ պետական համակարգի աշխատողներին կարող են խորհուրդ տալ այդպիսի դիմումներ չգրել, եւ նրանք իրենց աշխատանքից զրկվելու հեռանկարը նկատի ունենալով, կարող են դիմումներ չգրել: Այսինքն, այնուամենայնիվ, կուտակայինը կաշխատի կամավորի տակ, բայց համարյա պարտադիր հրամայականով: Այդ մասին է խոսում նաեւ այն հանգամանքը, որ պետությունն իր մասով շարունակելու է մուծումներ անել հիմնադրամներին նաեւ պարտադիրից հրաժարվողների մասով: Այդպիսով աշնանը, երբ կգա համակարգը փաթեթով կարգավորելու ժամանակը, համակարգի «կամավոր» մասնակիցների թիվն այնքան մեծ կլինի, որ պարտադիր բաղադրիչի կարիքն այն ժամանակ բոլորովին չի լինի: Համենայնդեպս, վերջին փոփոխությունը միայն 18 դեմ ձայն ստացավ, սրանց մեջ էին պատգամավորներ ՀԱԿ-ից, «Ժառանգությունից», ՕԵԿ-ից: Վերջինիս առաջարկը մերժվել էր, նրանք հայտարարեցին դեմ քվերակելու մասին : Իսկ 29 պատգամավոր «ձեռնպահ» էր քվեարկել: Փոփոխությամբՙ կուտակայինը չփոխանցելու դեպքում նաեւ գործատուն տույժ ու տուգանքի չի ենթարկվում, ընդ որում` օրենքը հետադարձ ուժով է օժտված ` 2014 հունվարի 1-ից ներառյալ: |
