ԲԵՌՆԱՐ ՇԱԼԱՆԴ. ԱՏՈՒՄ ԵՄ ՊԱՐՏՈՒԹՅՈՒՆԸ, ՀՈՒՅՍ ՈՒՆԵՄ` ՏՂԱՆԵՐԸ ՆՈՒՅՆՊԵՍ ԱՆԻ ԳԱՍՊԱՐՅԱՆ «Ինձ համար շատ կարեւոր է խաղալ այս հավաքականի հետ: Ես նոր մարզիչ եմ եւ ունեմ շատ խաղերի եւ ժամանակի կարիք»,- ասաց Բեռնար Շալանդը: Ֆուտբոլի հայաստանի ազգային հավաքականն առաջին մարզումն անցկացրեց գլխավոր մարզիչ Բեռնար Շալանդի գլխավորությամբ: Շվեյցարացի մասնագետը մարզչական նոր մեթոդներ կիրառեց աշխատանքում: Տղաները նախավարժանք կատարեցին, բռնոցի էլ խաղացին, հետո երկկողմանի հանդիպում անցկացրին. «Ես չեմ բացահայտել ֆուտբոլը, բայց ունեմ իմ գաղափարներն ու մտքերը, որոնք կիրառում եմ: Այս վարժությունների միջոցով ես ցանկանում եմ շեշտը դնել պրեսինգի վրա: Այն զարգացնել բոլոր գոտիներում` պաշտպանութան, կիսապաշտպանության, հարձակման, որպեսզի ավելի շատ տիրենք գնդակին»: Տասը օրում երեք ընկերական խաղ: Հայ ֆուտբոլիսնտները պատրաստվում են ԱՄԷ-ի, Ալժիրի եւ Գերմանիայի ընտրանիների հետ հանդիպումներին: Իրաքի հետ հանդիպումը չկայացավ, քանի որ նրանք չէին կարող գալ Հայաստան: Փոխարենը այլ լուծում գտան ի դեմս ԱՄԷ- հավաքականի. «Մենք ունենք երեք տարբեր մրցակիցներ: ԱՄԷ-ն չէի ասի հիանալի, բայց բավականին լավ թիմ է: Ալժիրը մասնակցում է Մունդիալ-2014-ին, ինչը վկայում է, որ նրանք եւս լավ թիմ ունեն: Ինչ վերաբերում է Գերմանիային, հավանաբար մենք գործ կունենանք աշխարհի առաջնության նոր չեմպիոնի հետ: Բայց Գերմանիայի ընտրանու նման ուժեղ թիմերի դեմ խաղերում չպետք է վախենանք: Այո՛, ես երբեք ֆուտբոլիստներին չեմ ասում, որ նման դեպքերում պետք է վախենալ: Մենք ունենք այնպիսի թիմ, որը գնդակ ունենալու դեպքում կարող է լուրջ հաջողությունների հասնել հարձակման գծում: Այնպես որ, պետք է պայքարենք եւ հասնենք ավելիին: Ես ատում եմ յուրաքանչյուր պարտություն, հույս ունեմ` տղաները նույնպես»: Բեռնար Շալանդի թիմում նոր անուններ կան: Մասնագետը ցանկանում է փորձարկել բոլոր խաղացողներին: Մարզումից լավ տպավորություններ ունի: Ընդհանուր առմամբ գոհ է տղաներից. «Ես ընտրել եմ այս խաղացողներին, հետեւաբար վստահում եմ նրանց: Սա լավ հնարավորություն է փորձարկելու ֆուտբոլիստներին, տեսնելու նրանց գործի մեջ եւ հասկանալու` ովքեր են պատրաստ առաջին խաղին: Ձախ եզրի համար մենք շատ խաղացողներ չունենք, իսկ Գագիկ Դաղբաշյանն իրեն հիանալի է դրսեւորում Հայաստանի առաջնությունում: Արթուր Եդիգարյանը մեզ կարող է միանալ միայն Գերմանիայում: Պետք է դիտարկել նոր ֆուտբոլիստների: Դրա համար էլ հրավիրեցի Ռումյան Հովսեփյանին եւ Արթուր Յուզբաշյանին»: Ինչ վերաբերում է մարտավարությանը, մարզիչը չի կարող ասելՙ խաղալու են մեկ, թե՞ երկու հարձակվողով: Կարեւորը տղաները լավ համագործակցեն միմյանց հետ. «Մենք չունենք մաքուր ընդգծված հարձակվողներ, բայց ունենք հարձակողական խումբ: Պետք է ամբողջ թիմով հարձակվենք եւ ամբողջ թիմով էլ պաշտպանվենք»: Շալանդը հետեւում է ինչպես Հայաստանի առաջնությունում, այնպես էլ Ռուսաստանի Պրեմիեր լիգայում հայ ֆուտբոլիստների խաղերին: Ասում է, որ դա իր աշխատանքն է: Պետք է ուսումնասիրի բոլորի խաղը: Ընտրական փուլը երկար է, կարող են լինել վնասվածքներ եւ որակազրկումներ, ուստի հավաքականը հնարավորինս շատ թեկնածուներ պետք է ունենա: Մունդիալ-2014-ի ֆավորիտներն ինչպես միշտ Իտալիան, Իսպանիան եւ Բրազիլիան են, սակայն Բեռնար Շալանդն ունի իր ֆավորիտը. «Աշխարհի առաջնությանը պետք է նայենք մասնագիտական տեսանկյունից, վերլուծենք մրցակիցների խաղը: Մրցաշարում ես ունեմ իմ ֆավորիտը: Դա Չիլիի հավաքականն է: Տեսել եմ նրանց գործի մեջ, մեծ պոտենցիալ ունեն: Իհարկե, նաեւ Շվեյցարիայի հավաքականը»: Հիշեցնենք, որ Հայաստանի ազգային հավաքականը մայիսի 27-ին, մայիսի 31-ին եւ հունիսի 6-ին ընկերական հանդիպումներ կանցկացնի համապատասխանաբար ԱՄԷ-ի, Ալժիրի եւ Գերմանիայի ընտրանիների հետ: | 
