ԵԺԿ-Ի ԸՆԴՈՒՆԱԾ ԲԱՆԱՁԵՎԸ ԿԱՐՈՂ Է ՆԱԽԱԴԵՊ ԴԱՌՆԱԼ Հայոց ցեղասպանության 100-րդ տարելիցին ընդառաջ տեղի ունեցած վերջին կարեւոր իրադարձությունը` մարտի 3-ին եվրոպական ամենամեծ քաղաքական կառույցի` Եվրոպական ժողովրդական կուսակցության ընդունած բանաձեւը Հայոց ցեղասպանության մասին իսկապես աննախադեպ փաստաթուղթ է, որը կարելի է հայ քաղաքական ուժերի հաջողությունն անվանել (ՀՀԿ, ՕԵԿ, «Ժառանգություն» կուսակցությունների միասնական ջանքերի արդյունք-նախագիծ): Քաղաքական թոհուբոհի մեջ այն մի տեսակ լավ չարժեւորվեց, մինչդեռ այն կարող է հետագա ընթացքի կողմնորոշիչ լինել: Բանաձեւում կոչ է արվում Թուրքիային եւ միջազգային կառույցներին` դատապարտելու Հայոց ցեղասպանությունը: Սա կարող է դուռ բացել, որ եվրոպական, ինչպես նաեւ տարբեր երկրների քաղաքական կառույցներ եւ կուսակցություններ եւս ընդունեն համանման բանաձեւեր: Այնպես որ մեր Ազգային ժողովի բոլոր կուսակցությունները պետք է իրենց կապերը գործի դնեն` Հայոց ցեղասպանության տարելիցին ընդառաջ առարկայական արդյունք ունենալու համար: |
