ԿԱՀԻՐԵՆ «ՀԱՄԱՍԸ» ՃԱՆԱՉԵՑ ԱՀԱԲԵԿՉԱԿԱՆ ԿԱԶՄԱԿԵՐՊՈՒԹՅՈՒՆ Պ. Ք. Եգիպտոսի դատարանը Գազայի հատվածում իշխող պաղեստինյան «Համաս» շարժումը ճանաչել է ահաբեկչական կազմակերպություն: Ռոյթեր գործակալությունը նշում է, որ «Համասի» ղեկավարությունը դատավճիռը համարում է «ցնցող եւ վտանգավոր»: Շարժման տարածած հայտարարության մեջ ասվում է, որ դատավճիռն «ուղղված է պաղեստինցի ժողովրդի եւ դիմադրության խմբավորման դեմ»: «Համասի» ղեկավարությունը նաեւ կարծում է, որ եգիպտական դատարանի վճիռը չի ազդի շարժման վրա, քանի որ վերջինս «վայելում է պաղեստինցի ժողովրդի եւ ազգի առաջնորդների հարգանքը»: Հունվարի վերջերին ահաբեկչական կազմակերպությունների ցանկում ընդգրկվել էր նաեւ «Համասի» մարտական թեւըՙ «Իզադդին ալ Քասամի բրիգադներ» խմբավորումը, որի գործունեությունը Եգիպտոսում արգելվել էր դեռ 2014-ի մարտին: «Համասը» Գազայի հատվածը կառավարում է 2007 թվականից: Համարվում է, որ «Համասը» Եգիպտոսում արգելված «Մուսուլման եղբայրներ» իսլամիստական կազմակերպության ճյուղավորումն է: Եվրոմիությունում «Համասը» ահաբեկչական կազմակերպությունների ցանկում էր 2003 թվականից, բայց անցյալ տարեվերջին ԵՄ դատարանը շարժման անունը հանեց ցանկից: Ի տարբերություն Իսրայելի, Կանադայի, ԱՄՆ-ի, Ճապոնիայի, Մեծ Բրիտանիան եւ Ավստրալիան ահաբեկչական են համարում շարժման միայն ռազմական թեւը: | 
