ՀԱՅ ԿԱԹՈՂԻԿԵ ԵՊԻՍԿՈՊՈՍԱԿԱՆ ՍԻՆՈԴԸ ՊԱՏՐԻԱՐՔ Է ԸՆՏՐՈՒՄ ԱՆ. Հ. Ավստրիայի կաթոլիկների մամլո գործակալությունըՙ kathweb-ը հուլիսի 16-ին իրազեկում է, թե շաբաթասկզբից հայ կաթողիկե եպիսկոպոսների սինոդը Ներսես Պետրոս 19-րդի մահից հետո Լիբանանի իրենց նստավայր Զմմառի վանքում նոր պատրիարք է ընտրում: Կահիրեում ծնված Ներսես Պետրոս 19-րդը մահկանացուն էր կնքել հունիսի 25-ին 75 տարեկան հասակումՙ սրտի կաթվածից: Հենվելով Լիբանանի «L՛Orient-Le Jour» օրաթերթի հրապարակման վրա, ավստրիական լրատվական գործակալությունը հայտնում է, թե հայ կաթողիկե եպիսկոպոսական սինոդը նախագահում է Ֆրանսիայում հայ կաթողիկե պաշտոնաթող եպիսկոպոս 80-ամյա Գրիգոր Կաբրոյանը (Krikor Ghabroian), որին Ֆրանցիսկոս պապը, արեւելյան եկեղեցիների իրավունքի համաձայն, հայ կաթողիկե եկեղեցու կառավարիչ է նշանակել: Մեկօրյա նախապատրաստական աղոթքից հետո հուլիսի 15-ին մեկնարկել են պատրիարքական ընտրությունները: Ապագա պատրիարքն ընտրվելու է 13 ընտրյալ եպիսկոպոսների ձայների երկու երրորդով: | 
