ԱԿԱՆԱԿԻՐ ՆԱՎԸ ՊՈԼ ԻԳՆԵՅՇՍԻ ԱՆՈՒՆՈՎ Հ. Ծ. Վաշինգտոնից «Միրոր-Սփեքթեյթր» շաբաթաթերթը տեղեկացնում է, որ ամերիկյան նավատորմի նորագույն ուղղորդիչ հրթիռներ կրող կործանիչ ականակիր նավը (DDG 117) ապրիլի 8-ին «կնքվել» է հայազգի ադմիրալ, ամերիկյան ռազմածովային ուժերի նշանավոր հրամանատարներից մեկիՙ Պոլ Իգնեյշսի անունով: Պաշտոնական արարողությունը տեղի է ունեցել Պասկագուլայի (Միսսիսիպի) Հանտինգտոն Ինգալս նավաշինարարական կենտրոնում: Պոլ Իգնեյշսը նախագահ Լինդոն Ջոնսոնի պաշտոնավարության ժամանակ (1967-69) եղել է նախ պաշտպանության փոխնախարար (սարքավորումների եւ մատակարարման գծով), ապա ռազմածովային ուժերի նախարար: Նրա անունը կրող կործանիչը 9.200 տոն է կշռում եւ 67-րդն է «Առլի-Բուրք» տեսակի ականակիր կործանիչների շարքում: Անվանակոչության արարողությանը մասնակցել է Պոլ Իգնեյշսի կինըՙ Նենսին: | 
