ԱՄՆ ՊԱՀԱՆՋՈՒՄ Է ՀՐԱԺԱՐՎԵԼ C-400 ՀԱՄԱԿԱՐԳԵՐԻՑ Հ. ՉԱՔՐՅԱՆ Դրա համար Թուրքիային երկու շաբաթ ժամանակ է տվել Միացյալ Նահանգները Թուրքիային մոտ 2 շաբաթ ժամանակ է տվել, որ վերջնականապես կողմնորոշվի ռուսական c-400 հակաօդային պաշտպանական համակարգերի ձեռքբերման առնչությամբ Ռուսաստանի հետ ստորագրած համաձայնագրի հարցում: Երեկ այդ մասին տեղեկացրել է ամերիկյան CNBC հեռուստատեսությունը, առանց նշելու տեղեկության աղբյուների անունները: Թուրքական լրատվամիջոցները իսկույն արձագանքեցին տեղեկությանը, որոնց անմիջապես միացավ նաեւ նախագահ Ռեջեփ Թայյիփ Էրդողանը: Ամերիկյան հեռուստատեսությունը մատնանշել է, որ c-400 համակարգերի վերաբերյալ Ռուսաստանի հետ կնքված համաձայնագրին հավատարիմ մնալու դեպքում Թուրքիան ենթարկվելու է պատժամիջոցների: Ըստ հեռուստատեսությանՙ եթե Թուրքիան մինչեւ հունիս ամսվա առաջին շաբաթվա վերջը չեղյալ չհայտարարի Ռուսաստանի հետ կնքված համաձայնագիրն ու ռոսական c-400 համակարգերի փոխարեն ԱՄՆ-ից չգնի «Patriot» համակարգեր, ապա ստիպված է լինելու դուրս մղվել F-34 ռազմական օդանավերի ծրագրից, դառնալու է ամերկյան պատժամիջոցների թիրախ, բախվելով ՆԱՏՕ-ի բուռն հակազդեցությանը: CNBC հեռուստատեսությանը իրազեկող աղբյուրները նշել են, որ բացառվում է Թուրքիային տրամադրված երկշաբաթյա ժամկետի երկարացումը» եւ դա ԱՄՆ-ի պետքարտուղարության վերջին նախազգուշացումն է: Վերջիններիս հավելելու նկատառումով պետքարտուղարության պատասխանատուն ամերիկյան հեռուստատեսությանն ասել է. «Հարկ եմ համրում ընդգծել, որ c-400 համակարգեր գնելու հետեւանքները խիստ բացասական են լինելու Թուրքիայի համար»: Ինչ վերաբերում է նախագահ Էրդողանին, ապա նա էլ, արձագանքելով CNBC հեռուստատեսությանը, մասնավորապես ասել է. «Մենք c-400 համակարգերի հարցում հետքայլ կատարելու խնդիր չունենք: Մանավանդ որ դրանք պաշտպանողական զենքեր են, ոչ թե հարձակողական: Այս համակարգերը մեզ Ռուսաստանը իակապես վճարման շատ հարմար պայմաններով է տրամադրում: Մենք դեռ c-400 համակարգերը ձեռք բերելուց հետո մտածում ենք Ռուսաստանի հետ c-500 համակարգերի համատեղ արտադրւթյուն սկսելու մասին: Տեղեկությունը քաղել ենք BBC-ի թուրքական ծառայության կայքէջից: | 
