ԳՏՆՎԵԼ Է ԶԱԲԵԼ ԵՍԱՅԱՆԻ ՓԱՍՏԱԹՈՒՂԹԸ Հ. Ծ. Փարիզի Նուբարյան գրադարանում ուսումնասիրություններ կատարելիս թուրք պատմաբան Ումիտ Քուրտը եւ լրագրող Ալեւ Էրը հայտնաբերել են մինչ այժմ չհրատարակված փաստաթուղթ Հայոց ցեղասպանության վերաբերյալ, տեղեկացնում է «Արմինյն Միրոր-Սփեքթեյթր» շաբաթաթերթը հիմնվելով «PanArmenian.Net» կայքի լրատվության վրա: Փաստաթղթի հեղինակը ճանաչված կին գրող Զաբել Եսայանն է, որի 11 էջանոց գրությունը մանրամասնություններ է պարունակում, թե ինչ պատահեց հայ կանանց 1915-ին եւ դրանից հետո: Եսայանը այդ փաստաթուղթը պատրաստել եւ ներկայացրել էր 1919-ին Փարիզում կայանալիք կոնֆերանսին մասնակցող Հայ ազգային պատվիրակության ներկայացուցիչՙ Պողոս Նուբար փաշային: Փաստաթղթում մասնավորապես նշված է, որ պատերազմի սկզբից թուրքերի «Միություն եւ Առաջադիմության կուսակցությունը» հետեւողականորեն ոչնչացրել է կայսրությունում ապրող ոչ մահմեդական բնակիչներին: Երիտասարդ կանայք եւ երեխաներ, որոնց թիվը գերազանցում է 200 հազարը, բռնի առեւանգվել են: 1878-ի Սկյուտարում ծնված վիպասանը, որ Փարիզում էր սովորել, միակ կինն էր մահվան դատապարտված գրողների ցուցակում: Նա հրաշքով փրկվում է Եղեռնից եւ ապաստանում Բուլղարիայում: Այնուհետեւ մեկնում է Եգիպտոս, Կիլիկիա եւ Հայաստան (1927-ին), որտեղ ֆրանսիական եւ համեմատական գրականություն է դասավանդել համալսարանի ուսանողներին: Վախճանվել է 1943-ին, ստալին-բերիական «մաքրագործումների» ժամանակ, առայժմ անհայտ հանգամանքներում: | 
