ՍԻՐՈՒՆ ԵՐԵՑՅԱՆԻ ՑՈՒՑԱՀԱՆԴԵՍԸ ՆՅՈՒ ՅՈՐՔՈՒՄ Հ. Ծ. Նյու Յորքի «Նկարչուհիների ազգային ընկերակցության» (NAWA) պատկերասրահում մարտի 5-ից մինչեւ այսօրՙ մարտի 27-ը գործում էր լոսանջելեսաբնակ տաղանդավոր նկարչուհի, քանդակագործուհի Սիրուն Երեցյանի «Գոյություն ունեմ» խորագրով ստեղծագործությունների անհատական ցուցահանդեսը: Նրա արվեստը երկու հակադիրՙ գեղեցիկի եւ տառապանքների աշխարհների արտացոլումն է: Առաջիններին նա կոչում է «արեւաշող», երկրորդներինՙ «լուսնաշող» գործեր: «Արեւաշողները» հարուստ ներկապնակ ունեն, վառ գույներ եւ կենսալի տարրեր են պարունակում, իսկ «լուսնաշողները» հիմնված են պատմական եւ անձնական փորձառության վրա, եւ ներառում են Հայոց ցեղասպանության, անապաստան կյանքի, հիվանդության եւ ինքնահաստատման տարրեր: Սիրունը ծնվել է 1951-ին Բեյրութում գտնվող «Տիրո» փախստականների հյուղավանում: Հայրը ցեղասպանությունը վերապրողներից է եղել, ով անցնելով Սիրիայի անպատներով հաստատվել է Բեյրութում: Վախճանվել է, երբ Սիրունըՙ հինգ զավակներից երկրորդը, ընդամենը 17 տարեկան է եղել: Նրան է վիճակվել ընտանիքի ապրուստը վաստակելու հոգսը: Բայց ցավալիորեն 2012-ին վարակվել է «ALS» կամ «Լու Գերիգի» (նեյրո-ապասերում) հիվանդությամբ, որը դժվարացնում է շնչառությունը, խոսելը եւ կուլ տալը: Սակայն այդ ծանր իրավիճակը երբեք չի ընկճել նրան եւ նա կամքի ուժով շարունակել է կատակներ անել եւ ստեղծագործել: Գեղարվեստի բնագավառում բակալավրի աստիճան է ստացել 1985-ին Օտիս-Պարսոնս արվեստի ինստիտուտից: Հեղինակ է երեք գրքերիՙ «Սիրուն Երեցյան» իր անունը կրող արվեստի գրքի, «Բառակերտում եւ սեւ նստարանի խոստովանություններ» խորագրով բանաստեղծությունների հատորի եւ «Սիրուն տառեր: Հայկական զարդարուն սկզբնատառեր» գլուխգործոցի, որը ներշնչանքի աղբյուր էր ծառայել այս տարվա ամերիկյան 126րդ տարեկան վարդի շքերթին առաջին անգամ մասնակցող ամերիկահայերի մրցանակակիր «լաստանավի» ձեւավորմանը: Նրա հանգուցյալ ամուսինը Հարութ Երեցյանն էր, Փասադենայի «Ապրիլ» գրատան տերը, որ հրատարակում էր «Ապրիլ» ամսաթերթը: Գրատունն ու խմբագրությունը Լոս Անջելեսի շրջանի մտավորականների կենտրոնն էր: Նույն քաղաքում Սիրունն ունի գեղեցիկ պատկերասրահ: 2014-ին Գլենդեյլի քաղաքային իշխանությունները նրան մրցանակի են արժանացրել խիզախորեն պայքարելու եւ ստեղծագործելու համար: «Նկարչուհիների ազգային ընկերակցությունը» հիմնադրվել է 1889-ին, որպես «Կանանց արվեստի ակումբ», սակայն 1941-ին վերանվանվել է: Նպատակն է խրախուսել Մ. Նահանգներում գործող կին արվեստագետներին: | 
