ԱՐԵՎԵԼՔ-ԱՐԵՎՄՈՒՏՔ ՀԱՆԴԻՊՈՒՄ ԱՄԵՐԻԿԱՅԻ ՀԱՅԿԱԿԱՆ ԹԱՆԳԱՐԱՆՈՒՄ Հ. Ծ. «Արմինյն Միրոր-Սփեքթեյթր» շաբաթաթերթի հոկտեմբերի 8-ի համարը տեղեկացնում է, որ հոկտեմբերի 23-ին Ամերիկայի հայկական թանգարանում (Ուոթերթաուն) բացվելու է Թոմ Վարդապետյանի եւ Սոնա Դուլգարյան-Գեւորգյանի համատեղ լուսանկարչական ցուցահանդեսը, որ գործելու է մինչեւ նոյեմբերի վերջը: Բացումը կատարվելու է թանգարանի Ադել եւ Հայկ Տեր-Մանվելյանի անվան պատկերասրահում: «Արեւելք-Արեւմուտք հանդիպում» ընդհանուր խորագիրը կրող ցուցահանդեսում ներկայացվելու են նրանց Հայաստան եւ Ղարաբաղ կատարած բազմաթիվ այցելությունների ժամանակ արված լուսանկարներ: Սոնա Գեւորգյանը աշխատում է որպես դաստիարակչուհի Կոնկորդի պետական դպրոցներում: Ապրում է Բեդֆորդում իր ամուսնուՙ Ալենի եւ երեք զավակներիՙ Տաթեւի, Ցոլինի եւ Նարինեի հետ: Նախկինում արեւելյան շրջանի Հայ օգնության միության կազմում է եղել: Ավարտել է Ամհերստի համալսարանի հասարակագիտական եւ միջազգային հարաբերությունների բաժինը: Լուսանկարչությունը նրա տարերքն է եղել փոքր տարիքից: Նրա լուսանկարները ցուցադրվել են Բեդֆորդի հանրային գրադարանում: Թոմ Վարդապետյանը անծանոթ չէ Ամերիկայի հայկական թանգարանում, որտեղ անցյալում շատ անգամներ է ցուցադրվել: Ցեղասպանության 100-ամյակի առթիվ նրա «Հայկական գյուղերի բնակիչները: Գյուղական խճանկար» խորագրով լուսանկարների շարքը ցուցադվել է Մերիմեք Վելլիի եւ Հարավային Նյու Հեմպշիրի գրադարաններում եւ արժանացել բարձր գնահատանքի: «Յունայտեդ Պրես ինտերնեշնըլ», «Ասոշիետեդ պրես», եւ «Նյու ինգլենդ պրես ասոշիետեդի» կողմից պարգեւատրվել է մի շարք մրցանակներով: «Նյու ինգլենդի կամերա կլաբի» խորհուրդը նրան «Վարպետ լուսանկարչի» տիտղոս է շնորհել: Վարդապետյանը նաեւ լրագրող է եւ «Մերիմեք Վելլիի հայերը» գրքի համահեղինակ: Աշխատակցել է «Հեյվրհիլ գազեթին» մինչեւ 2006 թվականը: Այժմ էլ շարունակում է հրատարակվել «Արմինյն Միրոր Սփեքթեյթր» շաբաթաթերթում: Ապրում է Հեյվրհիլում, ամուսնացած է, ունի երեք զավակ եւ վեց թոռ: Նկար 1. Սոնա Գեւորգյանը եւ Թոմ Վարդապետյան | 
