ԽԵՑԵԳՈՐԾ ՕՀԱՆՆԵՍՅԱՆԻ ՄԱՍԻՆ ԷՍՔԻՃՅԱՆ ԹԱՆԳԱՐԱՆՈՒՄ Հ. ԾՈՒԼԻԿՅԱՆ Կազմակերպությամբ Միշըն Հիլզում (Կալիֆոռնիա) գործող Արարատ-Էսքիճյան թանգարանի (AEM) եւ Հայկական ուսումնասիրությունների ազգային ասոցիացիայի (NAASR), թանգարանի դահլիճում վերջերս դասախոսություն է տեղի ունեցել նվիրված Երուսաղեմում հայկական խեցեգործության հիմնադիր Դավիթ Օհաննեսյանին: Օհաննեսյանի թոռնուհինՙ Սաթո Մուղալյանը ներկայացրել է իր պապի ոդիսականը հյուսող «Feast of Ashes: The Life and Art of David Ohannessian» (Աճյունների խրախճանքը: Դավիթ Օհաննեսյանի կյանքն ու արվեստը) հատորը: Մերձավոր Արեւելքի խռովահույզ ժամանակներում Անատոլիական մեկուսացված մի լեռնային գյուղում ծնված Դավիթն իր մաշկի վրա զգացել է Օսմանյան կայսրության վերջալույսին հետզհետե աճող ազգայնամոլության դաժան հետեւանքներըՙ ձերբակալություն, տարագրություն, սով ու ծարավ: Մազապուրծ հասնելով Երուսաղեմ, հարյուր տարի առաջՙ 1919-ին հիմքն է դրել հայկական խեցեգործության, որը մինչեւ օրս համարվում է «տեղական չգերազանցված գանձ»: Կյանքի վերջին տարիները նա անցկացրել է Եգիպտոսում եւ Լիբանանում: Իր պապին չճանաչած Սաթո Մուղալյանը ընտանեկան եւ գրադարանային արխիվները քրքրելով եւ նյութերը իրար կապակցելով ստեղծել է գաղթի, վերապրումի եւ երբեք չհանձնվելու առինքնող մի պատմություն, որը դուրս է գալիս ազգայինի շրջանակներից եւ ժամանակակից իրադարձությունների հենակետում ստանում համամարդկային նշանակություն: Մուղալյանը Նյու Յորքում մրցանակակիր ճանաչված ֆլեյտահար է: 1993-ին հիմնել է եւ ղեկավարում է «Perspectives Ensemble» համույթը, որի նպատակն է երեւան հանել եւ հանրությանը ներկայացնել արվեստագետների մոռացված ստեղծագործությունները: 2007-ից սկսած շրջագայել է տարբեր երկրներում (Թուրքիա, Իսրայել, Պաղեստին եւ Ֆրանսիա) փորձելով հավաքել իր պապի կյանքի ու արվեստի վերաբերյալ նյութեր: Գրել է բազմաթիվ հոդվածներ եւ դասախոսություններ կարդացել Երուսաղեմում խեցեգործության արվեստի սկզբնավորման մասին: Վերոնշյալ դասախոսության ավարտին ֆլեյտահար Սաթոն, տավղահար Անյա Գարիպոլիի հետ կատարել է Կոմիտաս վարդապետից երեք ստեղծագործություն: | 
