ԶԱՊԵԼ ԵՍԱՅԱՆԻ ԳԻՐՔԸ ԷԼԻՖ ՇԱՖԱՔԻ ԳՆԱՀԱՏՄԱՄԲ Հ.Ծ. Անցյալ տարվա դեկտեմբերի 26-ի համարում «Նյու Յորք Թայմս Բուք Ռիվյու» գրախոսականների ամերիկյան հանդեսը հարցազրույց է տպագրել ճանաչված թուրք մրցանակակիր վիպասան Էլիֆ Շաֆաքի հետ, որտեղ լրագրողիՙ «Ո՞րն է ձեր նախասիրած գիրքը, որն անծանոթ է ուրիշներին» հարցին նա պատասխանել է. «Զապել Եսայանի (1878-1943) «In the Ruins» («Աւերակներուն մէջ», 1911) գիրքը, որ պատմում է 1909ի Ատանայի ջարդերի մասին: «Վիպասան, մտավորական, հասարակական գործիչ եւ ֆեմինիստական շարժման ռահվիրա գրողը փայլուն մտքի տեր կին էր, որն առաջ էր անցել իր ժամանակից: Նրա այդ գիրքը սրտաճմլիկ ճիչ է, եւ խիստ կարեւոր ժամանակագրություն, որն անպայման պետք է կարդալ», նշել է նա: Շաֆաքը Եսայանի գրքին ծանոթացել է AIWA-ի (Հայ կանանց միջազգային ասոցիացիայի) լույս ընծայած անգլերեն թարգմանության միջոցով: AIWA-ն «Հայ կանանց գրական գանձերը» խորագրով մատենաշար է հրատարակում, որն արդեն, բացի «Աւերակներուն մէջ» հատորից անգլիախոս ընթերցողի սեղանին է դրել նաեւ Եսայանի «Սիլիհտարի պարտէզները» (1935 թ.) վեպ-հուշագրությունն ու «Հոգիս աքսորեալ» (1919 թ.) վիպակը: Շուտով լույս կընծայվի նաեւ Սրբուհի Տյուսաբի (Վահանյան, 1841-1901 թթ.) «Մայտա» վեպը: Էլիֆ Շաֆաքը գրում է ինչպես թուրքերեն, այնպես էլ անգլերեն լեզուներով: Նրա վերջերս լույս ընծայած գիրքը կոչվում է «10 րոպե եւ 38 վայրկյան այս տարօրինակ աշխարհում», որը «Booker Prize» 2019-ի մրցանակաբաշխութան եզրափակիչ փուլ էր հասել: Նրա մյուս հատորներն են «Ստամբուլի լակոտը», «Սիրո 40 օրենքները» եւ «Եվայի երեք դուստրերը»: «Կարդացեք կին գրողների, լրագրողների եւ բանաստեղծների գրությունները: Կին ասելով հասկանում եմ ընդհանրապես ամենատարբեր մշակութային անցյալ ունեցող էթնիկական խմբավորումների եւ ազգությունների իգական սեռի ներկայացուցիչներին», խորհուրդ է տվել Շաֆաքը հարցազրույցը վարող լրագրողին: | 
