ՀԱՅԿԱԿԱՆ ԱՍԱՑՎԱԾՔՆԵՐԻ ԺՈՂՈՎԱԾՈՒ ԲՈՒԼՂԱՐԵՐԵՆ Ա. Բ. Հունվարի 21-ին Սոֆիայի Բուլղար լրագրողների միության դահլիճում մոտ 90 ներկաների մասնակցությամբ կայացավ անցած տարեվերջին լույս տեսած «Անուշ հոտը վարդից կուզեն, մարդկությունը մարդուց կուզեն. հայկական առածներ ու ասացվածքներ» վերնագրով գրքի շնորհանդեսը: Ժողովածուն կազմել է սոֆիաբնակ պատմաբան, թարգմանչուհի Գոհար Խնկանոսյանը : Հատորն ընդգրկում է հայկական մոտ 400 ասացվածք, լույս է տեսել Սոֆիայի «Իզտոկ-Զապադ» («Արեւելք-Արեւմուտք») հրատարակչությունում, հրատարակվել է Հայկական դպրոցական ընկերության կողմից Բուլղարիայի Նախարարների խորհրդի ազգային փոքրամասնությունների խրախուսման ծրագրով: Գոհար Խնկանոսյանը ծնվել է Երեւանում, մանկուց բնակվում է Բուլղարիայում: Սոֆիայի Սուրբ Կլիմենտ Օխրիդսկու անվան համալսարանի բանասիրական բաժնում արժանացել է բակալավրի աստիճանիՙ հայ բանասիրության (1997-2001) ու մագիստրոսի աստիճանիՙ իրանագիտության գծով (1994-1999): Աշխատել է որպես հայոց լեզվի ուսուցչուհի Վիլյամ Սարոյանի անվան պետական դպրոցում եւ վարել է շաբաթօրյա դասընթացներ: Հայագիտական թեմաներով զեկուցումներով հանդես է եկել միջազգային գիտաժողովներում: 2018 թվականին Բուլղարիայի Գիտությունների Ակադեմիայում պաշտպանել է ատենախոսություն «Բուլղարիայի հայկական մշակութային օջախները 1878-1944 թթ.» թեմայով եւ արժանացել պատմական գիտությունների թեկնածուի աստիճանի: Աշխատակցել է բուլղարահայ մամուլին: Հայերենից բուլղարերեն թարգմանությամբ հրատարակել է նմուշներ հայ գրականությունից (Ակսել Բակունց, Հովհաննես Շիրազ, Սիլվա Կապուտիկյան, Յուրի Սահակյան եւն): | 
