ԳՈՐԾԱԿՑՈՒԹՅՈՒՆՙ ՑԱՆԿԱԼԻ ԱՐԴՅՈՒՆՔՈՎ. ԿԱՊԱՆԻ ԲԺՇԿԱԿԱՆ ԿԵՆՏՐՈՆՈՒՄ ԱՅՍ ՏԱՐԻ 9 ՆՈՐԱԾՆԻ ԿՅԱՆՔ Է ՓՐԿՎԵԼ Շուրջ տասը տարի առաջ, «BirthLink» ՀԿ-ն եւ ՎիվաՍել-ՄՏՍ-ը սկսեցին գործակցել Հայաստանում նորածնային մահացության դեպքերը կրճատելու ուղղությամբ: Այսօր արդեն, «BirthLink»-ն արձանագրում է, որ Հայաստանում նեոնատալ բժշկությունը զարգացնելուՙ գործընկեր կառույցների գերակա նպատակն իրականացել է. տարեցտարի ավելի ակնհայտ է դառնում ծրագրի երկարաժամկետ արդյունքը: Կազմակերպությունն այդ ամենը համարում է ոչ միայն նորագույն սարքավորումների կիրառման, այլեւՙ ՎիվաՍել-ՄՏՍ-ի ստանձնած երկարաժամկետ պարտավորության արդյունք: Կապանի բժշկական կենտրոնում, օրինակ, այս տարի նեոնատալ խնամք է ստացել եւ լիարժեք ապաքինվել է 9 նորածին: Նեոնատոլոգ Սերգեյ Գասպարյանն անչափ կարեւոր է համարում նորագույն տեխնոլոգիաներով նեոնատալ եւ նորածնային բաժանմունքների վերազինման եւ բուժանձնակազմի վերապատրաստման գործընթացը: Նրա գնահատմամբ գոհունակության ցուցանիշը փրկված երեխաներն են, որոնցից շատերն արդեն մեծ են եւ ապրում են ակտիվ, առողջ կյանքով: Ծրագրի կարեւորությունը բարձր են գնահատում նաեւ բուժանձնակազմի հոգատարությամբ եւ սարքավորումների շնորհիվ փրկված երեխաների ծնողները: 2008թ.-ին մեկնարկած գործակցության ծրագրով նորագույն սարքավորումներով վերազինվել է տարբեր մարզերում եւ մայրաքաղաքում գործող նորածնային 43 բաժանմունք: Ծրագրի հաջողությունն ապահովելու նպատակովՙ տարիների ընթացքում ՎիվաՍել-ՄՏՍ-ը շուրջ 600 մլն դրամ է հատկացրել նեոնատալ եւ նորածնային այդ բաժանմունքներին: Մասնագիտացված խնամքի եւ անհրաժեշտ սարքավորումների շնորհիվՙ Հայաստանի հեռավոր մարզերում կրճատվել է նորածնային մահացության եւ հիվանդացության մակարդակըՙ առողջական խնդիրներ ունեցող եւ ոչ բավարար քաշով ծնված երեխաներին պատշաճ բուժօգնություն ապահովելու միջոցով: Ոչ ինվազիվ շնչառական խնամքի համար կիրառվում են բուժական ժամանակակից մեթոդներ, որոնք ազդում են ծննդաբերության ժամանակ թոքերի հիվանդությամբ տառապող երեխաների վրա: Նորածնային մահացության ցուցանիշի կրճատումը կարեւոր մարտահրավեր է ամբողջ աշխարհում: Առողջապահության համաշխարհային կազմակերպության տվյալներով, ամբողջ աշխարհում մինչեւ հինգ տարեկան երեխաների մահացության 44%-ը կազմում են նորածնային մահացության դեպքերը: Խոցելի ժամանակահատվածում նորածիններին որակյալ բուժօգնության ապահովումը մեր երկրում հասանելի է դարձել 2008 թվականից: | 
