ՎԵՐԱԹՈՂԱՐԿՎՈՒՄ Է «ՇԻՆԴԼԵՐԻ ՑՈՒՑԱԿԸ» Հ.Ծ. Էկրան բարձրանալու 25-ամյակի առթիվ «Յունիվերսալ Պիկչըրզ» կինոստուդիան հայտարարել է, որ վերաթողարկելու է Ստիվն Զաիլյանի սցենարով ռեժիսոր Սթիվն Սփիլբերգի գլուխգործոցը համարվող «Շինդլերի ցուցակը» ֆիլմը, որը նշանակալի ներդրում էր կինոյի պատմության մեջ: Ֆիլմը, որն արժանացել էր 7 օսկար մրցանակի, ներառյալ լավագույն կինոնկար, լավագույն ռեժիսոր եւ լավագույն սցենար անվանակարգերում, պատմում է առեղծվածային Օսկար Շինդլերի իրական պատմությունը, որի ջանքերի շնորհիվ փրկվել էր ավելի քան 1.100 հրեաների կյանքը Հոլոքոսթի ժամանակ: Ֆիլմում Օսկարի դերը կատարում էր Լիամ Նիսոնը: Ֆիլմի ժամանակակից տեխնիկական պարամետրերով (4K, Dolby Cinema եւ Atmos) վերամշակված տարբերակը դեկտեմբերի առաջին շաբաթվա ընթացքում ցուցադրվելու է Մ. Նահանգներում եւ Կանադայում, հնարավորություն տալով նոր սերունդի ներկայացուցիչներին ծանոթանալու ֆիլմի խիզախ հերոսի ոգեշնչող պատմության հետ: «Հպարտ ենք, որ 20-րդ դարի այս կարեւորագույն ֆիլմի վերամշակված տարբերակը ներկայացնելու ենք հանրությանը: Պատմության վատթարագույն ժամանակաշրջանում գործած այդ մարդու սխրանքը այսօր էլ ուսանելի է», նշել է այդ առթիվ NBCUniversal-ի փոխնախագահ Ռոն Մեյերը : Դեկտեմբերյան պաշտոնական ցուցադրումից առաջ ֆիլմը ավագ դպրոցների եւ համալսարանների ուսանողների համար անվճար կրթական նպատակենրով ցուցադրվելու է որոշակի կինոթատրոններում «USC Shoah» հրեական հիմնադրամի կազմակերպությամբ: | 
