Տեղադրվել է` 2021-07-08 23:03:13 (GMT +04:00)

Ընթերցված է` 1169, Տպվել է` 6, Ուղարկվել է էլ.փոստով` 0

ՀԱՅԱՍՏԱՆԻ ԹԵՆԻՍԻ ՀԱՎԱՔԱԿԱՆԻ ՏՊԱՎՈՐԻՉ ԵԼՈՒՅԹՆԵՐԸ

ԳԵՎՈՐԳ ՄՈՂՐՈՎՅԱՆ

Օրերս Սկոպյեում կայացած Դեւիսի գավաթի խաղարկության եվրոպական գոտու 4-րդ ենթախմբի մրցմանը Հայաստանի թենիսի ընտրանին իր ուժերը չափեց Ալբանիայի, Ադրբեջանի եւ Չեռնոգորիայի հավաքականների հետ եւ տպավորիչ հաղթանակների շնորհիվ զբաղեցնելով երկրորդ հորիզոնականըՙ հնարավորություն ստացավ հաջորդ տարի Դեւիսի գավաթի 3-րդ ենթախմբում հանդես գալու:

Հայաստանի հավաքականի թենիսիստներ` Հենրիկ Նիկողոսյանը , Սեդրակ Խաչատրյանը , Միքայել Ավետիսյանը եւ Նադիր Սարգսյանը , մարզիչ Վահե Ավետիսյանի գլխավորությամբ խաղային առաջին օրը 2/1 հաշվով հաղթեցին Ալբանիայի ընտրանուն ,իսկ 2-րդ օրը նույն հաշվով պարտության մատնեցին Ադրբեջանի հավաքականին:

Ադրբեջանցիների դեմ մրցապայքարի առաջին խաղում Սեդրակ Խաչատրյանը 6:3, 6:0 հաշվով վստահ հաղթանակ տարավ Էլվին Հաշիմովի նկատմամբ: Երկրորդ մրցախաղում Միքայել Ավետիսյանը 5:7, 4:6 հաշվով զիջեց Թամերլան Ազիզովին:

Զուգախաղում Սեդրակ Խաչատրյանն ու Հենրիկ Նիկողոսյանը 1 ժամ 48 րոպե տեւած պայքարում 6:4, 1:6, 6:1 հաշվով պարտության մատնեցին Թամերլան Ազիզով եւ Էլվին Հաշիմով զույգին:

Աշխարհի թիմային առաջնությունում Հայաստանի ընտրանին ենթախմբում զիջեց միայն Չեռնոգորիայի թիմին` 0/3 հաշվով:

Ադրբեջանի նկատմամբ տարած վստահ հաղթանակի, մրցաշարի եւ հարակից խնդիրների մասին զրուցեցինք Հայաստանի հավաքականի թենիսիստ Հենրիկ Նիկողոսյանի հետ.

- Տարաք անչափ կարեւոր հաղթանակ Ադրբեջանի թիմի նկատմամբ: Մե՞ծ էր պատասխանատվությունը խաղից առաջ:

- Շատ մեծ, որովհետեւ ընդհանուր հաշիվը 1-1 էր ու երրորդ խաղը զուգախաղ էր,որտեղ ես եւ Սեդրակ Խաչատրյանն էինք խաղում: Ընդհանրապես չէինք զգում ոչ հոգնածություն, ոչ լարվածություն, մեր նպատակը միայն հաղթանակն էր: Ամեն ինչ ստացվում էր իդեալական, եւ հաղթեցինք:

- Ի՞նչ զգացողություններ ունեցաք նման սկզբունքային մրցակցին պարտության մատնելուց հետո:

- Շատ մեծ բեռ ասես ընկներ մեր վրայից,այնպիսի տպավորություն էր, կարծես մեր ողջ կյանքի ընթացքում մարզվել էինք հենց այդ օրվա ու խաղի համար,իսկ հաղթանակից հետո ամեն բան թեթեւացավ մեր շուրջբոլորը:Անչափ կարեւոր հաղթանակ էր սա մեզ համար:

- Առջեւում կա՞ն նոր մրցարշարեր,որոնց մասնակցելու է թենիսի Հայաստանի հավաքականը:

- Հավաքականի խաղերը, որպես այդպիսին լինում է տարին մեկ անգամ, Դեւիսի գավաթի շրջանակներում,ուստի հաջորդ տարի պետք է խաղանք այդ մրցարշարի հաջորդ ենթախմբում:

- Չնայած վստահ հաղթանակներինՙ ենթախմբում զբաղեցրեցիք 2-րդ հորիզոնականը: Ի՞նչը չբավականցրեց 1-ին տեղը գրավելու համար:

- Կարծում եմ ավելի շատ փորձի պակասը խանգարեց մեզ, որ հաղթեինք Չեռնոգորիային: Ճիշտ է, իրենք ուժեղ էին, սակայն փորձի պակասը իր դերը խաղաց: Նրանք ի տարբերություն մեզ անընդհատ մասնակցում են մրցարշարերի, իսկ մեր դեպքում դա մեծ ֆինանսների հետ է կապված:

- Ի՞նչ քայլեր են հարկավոր ձեռնարկել թենիսը մեր երկրում էլ ավելի պրոֆեսիոնալ մակարդակի հասցնելու համար, ինչն էլ իր հերթին միջազգային նոր հաղթանակներ կբերի մեր երկրին:

- Ավելի պրոֆեսիոնալ մակարդակի հասցնելու համար կարծում եմ պետք է գտնել հովանավորներ, որպեսզի ավելի շատ մրցումներ կազմակերպվեն մեր երիտասարդների ու երեխաների համար: