ՌԵԺԻՍՈՐ ԱՆՆԱ ՄԵԼԻՔՅԱՆԻ «ՍԻՐՈ ՄԱՍԻՆ» ՖԻԼՄՆ ԱՐԺԱՆԱՑԵԼ Է ՄՐՑԱՆԱԿԻ Մ. Հ. 26-րդ «Կինոտավր» բաց ռուսական փառատոնի գլխավոր մրցանակը շնորհվեց ռեժիսոր Աննա Մելիքյանի «Սիրո մասին» ֆիլմին: «Ֆիլմերը տարբեր էին, այս տարի շատ հետաքրքրական ծրագիր էր: Եթե որեւէ մեկը մտածի, որ մենք ճիշտ չենք վարվել, ամբողջ պատասխանատվությունը ես եմ ստանձնում»,- ասել է մրցույթի ժյուրիի նախագահ, ռեժիսոր Ալեքսեյ Ուչիտելը: «Սիրո մասին» ֆիլմը մի քանի նովելների ժողովածու է, որոնց միավորում է սիրո թեման: Մելիքյանի ֆիլմում խաղացել են Ռենատա Լիտվինովան, Եվգենի Ցիգանովը, Վլադիմիր Մաշկովը, Յուլյա Սնիգիրը, Ռավշանա Կուրկովան, Մարիա Շալաեւան, Ալեքսանդրա Բորտիվը եւ ուրիշ դերասաններ: «Ինձ համար սա շատ կարեւոր մրցանակ է, քանի որ ես առաջին անգամ եւ միանգամայն գիտակցաբար այս կինոնկարն արել եմ հանդիսատեսի համար, լայն կինովարձույթի համար»,- ասել է Աննա Մելիքյանը մրցանակը ստանալիս: Ինչպես նշվում է, լավագույն ռեժիսորական աշխատանքի համար մրցանակը շնորհվել է Ալեքսեյ Ֆեդորչենկոյին «Հեղափոխության հրեշտակները» ֆիլմի համար: Այն պատմում է մի խումբ ավանգարդիստ նկարիչների մասին, որոնք 1930-ական թթ. խորհրդային իշխանության հանձնարարությամբ մեկնում են լուսավորելու Հյուսիսի բնիկ ժողովուրդներին: | 
