«ԸՆՏԱՆԵԿԱՆ ՊԱՏԿԵՐՆԵՐ»ՙ ՑՈՒՑԱՀԱՆԴԵՍ ՈՒՈԹԵՐԹԱՈՒՆԻ ՀԱՅԿԱԿԱՆ ԹԱՆԳԱՐԱՆՈՒՄ Հ. Ծ. Ուոթերթաունի Հայկական թանգարանում (ALMA) հունվարի 17-ին բացվել է «Ընտանեկան պատկերներ» ընդհանուր խորագրով Սյուզան Գրիգորյանի լուսանկարչական ցուցահանդեսը, որտեղ օգտագործելով Օսմանյան դարաշրջանի դիմանկարներ, վավերագրական նյութեր եւ ընտանեկան խորհրդանշաններ ու հայկական սրբազան իրեր, հեղինակը Ամերիկայում ապաստանած հետ-եղեռնյան սերնդի եւ նրանց ժառանգների ինքնությունն է փորձել ներկայացնել, չմոռանալով պատշաճ հարգանքի տուրք հավաստելու նաեւ կորսված հայրենիքին: Հայկական արմատներին ամուր կառչած ընտանիքում ծնված Սյուզան Գրիգորյանը հաճախել է Թաֆթս համալսարանում գործող Գեղարվեստի թանգարանի վարժարանը, եւ սովորել գծագրություն, նկարչություն, լուսանկարչություն եւ գունային տեսություն: Այնուհետեւ տեղափոխվել է Նյու Յորք եւ զբաղվել ուսուցչությամբ միջնակարգ դպրոցում: Մագիստրոսի գիտական աստիճան է ստացել (կրթության գծով) Բենկ Սթրիթի կրթական քոլեջից: | 
