ՎԱԽՃԱՆՎԵԼ Է ՃԱՆԱՉՎԱԾ ՋՈՒԹԱԿԱՀԱՐ ԱՆԱՀԻՏ ԱՃԵՄՅԱՆ-ԱՎԱԳՅԱՆԸ Իննսուներկու տարեկանում վախճանվել է տաղանդավոր ջութակահարուհի Անահիտ Աճեմյան-Ավագյանը: Ծնվել էր Նյու Յորքում 1924 թվին: Երաժշտական կրթությունն ստացել էր հանրահայտ Ջուլյարդ երաժշտանոցում: 1946-ին, դեռ ուսանող, մասնակցել է մրցման եւ արժանացել Ուոլթըր Նաումբերգ հիմնարկի մրցանակին: Նույն տարում քաղաքապետարանում իր առաջնաելույթը մեծ գնահատանքի է արժանացել եւ «Մադմուազել» ամսագիրը նրան շնորհել է «Նշանակալի ձեռքբերում» մեդալըՙ հռչակելով նրան երաժշտության բնագավառում «Տարվա երիտասարդ կինը»: Հետագայում ժամանակակից դասական երաժշտությանը բերած իր նպաստի համար պարգեւատրվել է նաեւ «Սբ. Հակոբի» շքանշանով, որը նրան «Մալթայի Ասպետի» կոչում է տվել: Իր քրոջՙ դաշնակահարուհի Մարոյի հետ բազմաթիվ համերգներ է տվել Եվրոպայում, Կանադայում եւ Մ. Նահանգներում: «Նյու Յորք Թայմսի» երաժշտական տեսաբանը նրանց համարել է վիրտուոզ տաղանդի տեր քույրեր: Անահիտը 1940-ականներին Նյու Յորքում համահիմնադիրն է եղել «Հայ երաժշտության բարեկամներ հանձնախմբի», որը մեծապես նպաստել է երգահան Ալան Հովհաննեսի կարիերայի առաջխաղացմանը: Այնուհետեւ, 1960-ականներին ջութակահար Մեթյու Ռայմոնդիի հետ հիմնել է «Երգահանների լարային քառյակը», որը շուտով միջազգային ճանաչում է ձեռք բերել, շրջագայելով մոտ 30 երկրներ, որոնց թվում Խորհրդային Միություն, Հնդկաստան, Ճապոնիա, Ավստրալիա եւ Չինաստան: Անահիտ Աճեմյանը նաեւ երկար ժամանակ ժյուրիի անդամ է եղել «Կոլումբիա համալսարանի» երաժշտական ֆակուլտետի կազմակերպած մրցույթներում: «ԱԶԳ-ը» ցավակցում է հանգուցյալի հարազատներին: | 
