ՆԱԴԵԺԴԱ ԴԱՎԹՅԱՆ Ա. Բ. (1951-2019) Հունիսի 15-ին վախճանվել է ՀՀ վաստակավոր արտիստուհի, 1970-1990 թթ. Երեւանի օպերայի եւ բալետի թատրոնի առաջատար պարուհի, պարուսույց, փորձավար Նադեժդա Դավթյանը : Ծնվել էր 1951 թվականին, Մոսկվայում: 1968 թվականին ավարտել է Երեւանի պարարվեստի ուսումնարանը (Դինա Գացինայի դասարան): 1968-ից աշխատել է Սպենդիարյանի անվան օպերայի եւ բալետի ազգային ակադեմիական թատրոնում` նախ որպես բալետի պարուհի, 1989-իցՙ փորձավար: Դերապարերից ենՙ Կիտրի («Դոն Կիխոտ»), Ժիզել եւ Գայանե (Համանուն բալետներում), Էգինա («Սպարտակ»), Խանդութ («Սասունցի Դավիթ»), Ջուլիետ («Ռոմեո եւ Ջուլիետ»), Շամիրամ («Արա Գեղեցիկ - Շամիրամ»), Գերդա («Ձյունե թագուհին»), Էմիլիա («Օթելլո»): Հյուրախաղերով հանդես է եկել Իսպանիայում (Մոսկվայի Մեծ թատրոնի հետ), Արգենտինայում, Վիետնամում, Կամբոջայում, Լաոսում, Լեհաստանում, Ռուսաստանում, Ուկրաինայում, Մեքսիկայում, Ֆրանսիայում, Չիլիում, Էկվադորում, Պարագվայում եւ այլուր: 1987-1989 թթ. որպես մենապարուհի եւ փորձավար աշխատել է Մոնտեվիդեոյի (Ուրուգվայ) պետական բալետում: 1998-1999 թթ. դասավանդել է Սեուլի (Հարավային Կորեա) արվեստի պետական համալսարանում, ստացել համալսարանի պրոֆեսորի կոչում: Նրա կենսագրությունը տեղ է գտել 1981-ին, Մոսկվայում Յուրի Գրիգորովիչի խմբագրությամբ լույս տեսած «Բալետ» հանրագիտարանում (էջ 172): Մեր խորին ցավակցությունները Նադեժդա Դավթյանի ամուսնունՙ ՀՀ ժողովրդական արտիստ, պարող, պարուսույց, բալետմայստեր Վիլեն Գալստյանին եւ որդունՙ բալետի արտիստ Դավիթ Գալստյանին: |
