ԿՈՄՈՒՆԻՍՏՆԵՐԻ ՄԱՅԻՍՄԵԿՅԱՆ ՆՈՍՏԱԼԳԻԿ ԵՐԹԸ Ա. Մ. «Պրոլետարներ բոլոր երկրների միացեք», «Հավերժ Ռուսաստանի հետ», «Հայաստանի կոմունիստական կուսակցություն» եւ այլ լոզունգներով, Մարքսի, Լենինի, Ստեփան Շահումյանի նկարներով, Խորհրդային Հայաստանի եւ Խորհրդային Միության կարմիր դրոշներով երեկ մայիսմեկյան երթ եւ հանրահավաք էին կազմակերպել Հայաստանի կոմունիստները: Աշխատավորների օրվան նվիրված նրանց երթը, սկսվելով Մաշտոցի պողոտայից, շարունակվեց Ամիրյան փողոցով եւ ավարտվեց Շահումյանի հրապարակում: Երթին եւ հանրահավաքին մասնակցում էին մի քանի հարյուր մարդ, հիմնականում ավագ սերնդի ներկայացուցիչներ եւ պատանիներ ու դպրոցական բարձր տարիքի երեխաներ: Երթը ընթանում էր խաղաղ, կազմակերպիչները ժամանակ առ ժամանակ հնչեցնում էին խորհրդային տարիներին հայտնի կոչերըՙ անցորդների ժպիտն առաջացնելով: Հնչում էր դարձյալ այդ տարիների շքերթի ժամանակ հնչող նվագախմբային երաժշտությունը, շատերին հիշեցնելով խորհրդային շրջանի մանկության կամ պատանեկության տարիները: |
