Տեղադրվել է` 2013-05-01 23:35:51 (GMT +04:00)

Ընթերցված է` 2149, Տպվել է` 82, Ուղարկվել է էլ.փոստով` 70

ՌՈՒՍԼԱՆ ՑԱՐՆԻՆ ՆԵՐՈՂՈՒԹՅՈՒՆ Է ԽՆԴՐԵԼ ՀԱՅ ՀԱՄԱՅՆՔԻՑ

Ի. Պ.

Ապրիլի 30-ին Ռուսլան Ցարնին` հորեղբայրը Թամերլան ու Ջոհար Ցարնաեւների, որոնք համարվում են վերջերս Բոստոնի մարաթոնի ժամանակ տեղի ունեցած ահաբեկչության հեղինակները, անձամբ կապվել է Բոստոնում հրատարակվող «Արմինյն միրոր-սփեքթեյթր» շաբաթաթերթի հետ ու հայ համայնքից ներողություն խնդրել իր վերջին հայտարարությունների համար:

Բոստոնի մարաթոնի ժամանակ տեղի ունեցած պայթյունների մասին իր վերջին քննարկումներում Ռուսլան Ցարնին հիշատակել էր հայերին: Լրատվամիջոցներին փոխանցած իր նախկին հայտարարություններում նա խոսել էր վերջերս իսլամ ընդունած Միշայի մասին (Միշայի անունն այժմ հաղորդվում է որպես Միխայիլ Ալախվերդով): Ռուսլան Ցարնին ասել էր` Միշան, որն ունի հայկական ծագում, ոչ մուսուլմանների հանդեպ բռնության պատկերացումներով «լվացել» է Թամերլան Ցարնաեւի ուղեղը:

«Արմինյն միրոր սփեքթեյթրից» տեղեկանում ենք, որ Ռուսլան Ցարնին, զանգելով թերթի խմբագրություն, նշել է, որ Միշայի ազգային պատկանելությունն իր հայտարարության հետ որեւէ կապ չունի: «Հայաստանը շատ հզոր մշակույթ ունի, կուզենայի այդ հայտարարությունս երբեք արած չլինեի», ասել է Ռուսլան Ցարնին` եւս մեկ անգամ ներողություն խնդրելով, որ հայ համայնքի անունը կապել է «այս չարամիտ իրադարձությանը»:

Թեմայի մասին հեռախոսով Ցարնին խոսել է հակիրճ եւ ասել, որ չի կարող պատասխանել լրացուցիչ հարցերի կամ մեկնաբանել:

Իսկ որոնումը հեռախոսահամարի, որից զանգահարել էր Ցարնին, հաստատել է` հեռախոսազանգը ստացվել է Մերիլենդի մի բջջային հեռախոսից` գրանցված հենց Ցարնիի անունով:

«Ազգ»-ը ավելի մանրամասն կանդրադառնա Ցարնիներինՙ առաջիկայում