ԱՐՈՆՅԱՆՆ ԱՐԺԱՆԱՑԱՎ 30 ՀԱԶԱՐ ԵՎՐՈ ՊԱՐԳԵՎԱՎՃԱՐԻ Լեւոն Արոնյանը դարձավ Ալյոխինի հուշամրցաշարի հաղթող` 9 հնարավորից վաստակելով 5,5 միավոր: Ավարտական տուրում նա կարեւոր հաղթանակ տոնեց Մաքսիմ Վաշիե-Լագրավի նկատմամբ ու միավորներով հավասարվեց Բորիս Գելֆանդին, որը հաշտություն էր կնքել Անանդի հետ: Գլխավոր մրցանակի տերը որոշվեց լրացուցիչ գործակիցներով: Առաջին ցուցանիշը` սեւերով խաղացած պարտիաների քանակը, երկուսի մոտ էլ հավասար էր` 5-ական: Արոնյանը 2-րդ ցուցանիշով գերազանցեց Գելֆանդին ու դարձավ մրցաշարի հաղթող: Նա տոնել էր 3 հաղթանակ, Գելֆանդը` 2: Վերջինս կստանա 20 հազար եվրո: Կրամնիկը հաղթեց Ադամսին, Վիտյուգով-Լիժեն, Սվիդլեր-Ֆրեսինե պարտիաներն ավարտվեցին ոչ-ոքի: 5 միավորով 3-րդ տեղը զբաղեցրեց Անանդը, որը 15 հազար եվրո կստանա: Հաջորդ տեղերում են Վաշիե-Լագրավը, Ադամսը, Ֆրեսինեն, Վիտյուգովը, Կրամնիկը` 4,5-ական, Լիժենը` 3,5, Սվիդլերը` 3 միավոր: |
