«ՀԻՇՈՂՈՒԹՅՈՒՆՆԵՐԻ ՄԵՋ ՄՈԼՈՐՎԱԾ» Հ. Ծ. Օն-լայն բանախոսություն Ամերիկյան համալսարանում Հայերի ցեղասպանության վերաբերյալ Թուրքիայի պետության պաշտոնական քաղաքականությունը եղել եւ մնում է հերքումը: Այդ քաղաքականության բաղկացուցիչ մասերն են երեք «Մ-երը»ՙ մոլորեցումը, միստիֆիկացիան եւ մանիպուլյուցիան: Բայց երբ սոցիալական հիշողությունն ենք փորփրում թուրք հասարակության, տեսնում ենք բոլորովին տարբեր մի պատկեր: Նույնիսկ մոտ մեկ դար անց մեծահասակ թուրքեր եւ քրդեր, հատկապես արեւելյան Թուրքիայում, դեռ վառ հիշողություններ ունեն հայերի ցեղասպանության մասին», ասում է Ամստերդամի «Պատերազմի, հոլոքոսթի եւ ցեղասպանության ուսումնասիրությունների ինստիտուտի» ավագ կուրսերի տնօրեն դոկտ. Ուղուր Ումիտ Ունգորը : Նա այսօրՙ մայիսի 2-ին, ժամը 18.30-ին Հայաստանի ամերիկյան համալսարանում Ամստերդամից ուղիղ կապով օն-լայն բանախոսություն է կարդալու «Հայերի ցեղասպանության հիշողությունը թուրքական ինքնության մեջ» թեմայով: Դոկտ. Ունգորը Ուտրեխտ համալսարանի պատմության ամբիոնում պրոֆեսորի օգնական է: Նրա վերջին շրջանի գրքերից են «Առգրավում եւ ոչնչացում: Հայկական ունեցվածքի խլումը երիտթուրքերի կողմից» եւ «Արդի Թուրքիայի ստեղծումը: Ազգություն եւ պետություն, 1913-1950 թթ.» հատորները: | 
