RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ
#009, 2021-03-12 > #010, 2021-03-19 > #011, 2021-03-26 > #012, 2021-04-02 > #013, 2021-04-09

«ԱԶԳ» ՕՐԱԹԵՐԹ #11, 26-03-2021



Տեղադրվել է` 2021-03-25 22:59:02 (GMT +04:00)


Ընթերցված է` 584, Տպվել է` 5, Ուղարկվել է էլ.փոստով` 0

ԳԵՂԵՑԿՈՒԹՅՈՒՆՙ ԶԻՆՎՈՐՆԵՐԻՑ

ՀԱՍՄԻԿ ՄԽԻԹԱՐՅԱՆ, ՀՊՄՀ կուլտուրայի ֆակուլտետ, 3-րդ կուրս լրագրության բաժին

Հայրենիքի պաշտպանի վերականգնողական կենտրոնում վերջին պատերազմից վիրավորված զինվորները երկրորդ կյանք են տալիս թիթեռներին. տղաները թիթեռներից կոմպոզիցիաներ են պատրաստում:

Նրանց ձեռքով պատրաստված աշխատանքների ցուցահանդես-վաճառքը կայանալու է ապրիլի 3-ին, ժամը 16:00-ին, Հայրենիքի պաշտպանի վերականգնողական կենտրոնում: Ցուցահանդես-վաճառքի ամբողջ հասույթը փոխանցվելու է Զինվորի տանը:

«Թիթեռներից կոմպոզիցիաներ ենք պատրաստում: Աշխատանքը ինձ դուր եկավ, քանի որ բուժումներից ու պարապմունքներից հետո զբաղվելով թիթեռներովՙ հանգստանում ես, ցրվում: Ավելի շատ հոբբի է»,- մեզ հետ զրույցում ասաց սպա Հենրիկ Շաքարյանը , որը հրազենային վերք է ստացել Արցախի հյուսիսային սահմաններից մեկում:

Ժամկետային զինծառայող Հայկը վիրավորվել է հոկտեմբերի 16-ին Հադրութում: Նա եղել է «Ես եմ» ծրագրի առաջին զինվորներից:

«Երբ պատերազմը սկսվեց, դիրքերում էինք, գործ էինք անում, երբ նկատեցի, որ վերեւում ինչ-որ բան տրաքեց: Մերոնք նրանց անօդաչուին էին հարվածել: Ու այդպես, հանկարծակի սկսվեց ամեն ինչ»,- պատմում է Հայկը: Զրուցակիցս մասնագիտությամբ էներգետիկ ինժեներ է, թիթեռների հետ աշխատանքը իրեն շատ է հետաքրքրել, ասում էՙ վերականգնողական կենտրոնից դուրս գալուց հետո էլ կցանկանա զբաղվել այդ աշխատանքով:

Կամավոր Պետրոս Էֆենջյանին սկզբից էլ դուր է եկել թիթեռներով կոմպոզիցիա պատրաստելու գաղափարը:

«Հանգստանում եմ այս աշխատանքի ժամանակ: Ավելի շատ լինում եմ բարի մտքերի հետ ու գիտակցում եմ, որ բարի գործ եմ անում, ինչն էլ ինձ հաճույք է պատճառում»,- ասում է նա:

Պետրոսը պատմում է, որ պատերազմի առաջին օրվանից կամավորագրվել է, վիրավորվել է հոկտեմբերի 14-ինՙ հակառակորդի ինքնաթիռի հարվածից: Մարտական գործողությունների է մասնակցել Քարվաճառում: Պետրոսը մեկ ամիս է Վերականգնողական կենտրոնում, մինչ այդ բուժում է ստացել «Էրեբունի» ԲԿ-ում:

Նախագծի հեղինակ եւ խմբի անդամ Հելեն Առաքելյանն էլ պատմեց, թե ինչպես որոշեց նման նախաձեռնությամբ հանդես գալ. «Մտածում էիՙ ինչ կարող եմ անել տղաների կողքին լինելու համար եւ ինչը կօգնի նրանց: Ես այս աշխատանքով արդեն 10 տարի է չէի զբաղվում: Հասկացա, որ տղաներին կօգնի այն, քանի որ ձեռքի աշխատանքը հանգստացնում է նյարդային համակարգը, նաեւ գեղեցիկը, ստեղծագործելու ընթացքը զբաղեցնում է մարդու միտքը:

Սկզբում շատերն էին տարակուսանքով նայումՙ թիթեռ, զինվոր... Բայց երբ հանդիպեցինք, զրուցեցինք, հասկացա, որ պետք է անենք:

Թիթեռների հետ աշխատանքի ընթացքում հասկացա, թե որն է այս տղաների ուղերձը ժողովրդին. ինչպես այնտեղ էին առաջնագծում կռվում, պաշտպանում հայրենիքը, այնպես էլ հիմա: Այս աշխատանքներն իրենք անում են ոչ միայն ի բարօրություն իրենց, որ զբամունք լինի, ավելի լավ զգան, այլ ուզում են ողջ հասույթը փոխացնել այս կենտրոնին: Թվում է, թե իրենք ունեն օգնության կարիք, բայց իրենք են ուզում օգնել իրենց ընկերներին, որոնք բուժում են ստանում այստեղ»:

Տիկին Հելենը տղաներին սովորեցնում է ամեն ինչ: Նրանք խնձորենու, կեռասենու, յասամանի, տանձենու ճյուղերը հղկում, լաքապատում ու չորացնում են, ապա դիզայներները որոշում են, թե ինչպես պետք է ստեղծվի կոմպոզիցիան: Թիթեռներին գույն չեն տալիս, մշակում են միայն մարմինները, որ չփտեն:

Ժամկետային զինծառայող Սեյրանն էլ վարում է ինստագրամյան էջը, որտեղ ներկայացված են տղաների պատրաստած աշխատանքները:

«Արձագանքը շատ լավ է, բավականին ակտիվ առաջ ենք գնում: Հիմնական ցանկացողները արտերկրից են, որն էլ մեզ ավելի է ոգեւորում»,- մեծ ոգեւորությամբ պատմում է Սեյրանը:

Վերկանգնողական կենտրոնում բժիշկները տղաներին, իսկ տղաները թիթեռներին են երկրորդ կյանք տալիս:

 
 

«ԱԶԳ» ՕՐԱԹԵՐԹ #11, 26-03-2021

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ