ՄՇԱԿՈՒԹԱՅԻՆ ԱՄՍԱԳՐԻ ՆՈՐ ՀԱՄԱՐԸ ԱՆԱՀԻՏ ՂԱԶԱՐՅԱՆ «+Կինո» N 2 Լույս է տեսել «+Կինո»-ի այս տարվա երկրորդ համարը: Մեր այն հարցին, թե ի՞նչ նոր նյութեր են տեղ գտել այս անգամ, ամսագրի գլխավոր խմբագիր Ռոբերտ Մաթոսյանն ասաց. - Այսօր երիտասարդ սերունդը օբյեկտիվ եւ սուբյեկտիվ պատճառներով անտեղյակ է, կամ շատ քիչ բան գիտե իր անցյալի մշակույթի գործիչների, նրանց ստեղծածի մասին: Ինտերնետային եւ ֆեյսբուքյան հակիրճ ինֆորմացիաները, իմ կարծիքով, մեկ-երկու օրվա սնուցման աղբյուր կարող են դառնալ, իսկ մենք այս համարում աշխատել ենք հրապարակել այնպիսի նյութեր ու հոդվածներ, որոնք ինչ-որ չափով մնայուն տեղ կարող են գրավել: Այսպես` այս տարի կնշվի Թումանյանի, Չարենցի, Իսահակյանի, Սարյանի ժամանակակից` ԽՍՀՄ ժողովրդակա արտիստ Վաղարշ Վաղարշյանի ծննդյան 120-ամյակը, որը նկարահանվել է «Լեռնային քայլերգ», «Առաջին սիրո երգը», «Անձամբ ճանաչում եմ», «Արտակարգ հանձնարարություն» ֆիլմերում, իսկ թատրոնում կերտել Եգոր Բուլիչովի անզուգական կերպարը: Քսան տարի շարունակ Սունդուկյանի անվան թատրոնի բեմահարթակից հնչած շեփորահարին ուղղորդող նրա ողբերգական կոչը` «Փչի՜ր, Գավրիլա, աշխարհի վախճանն է, փչի՜ր», այսօր էլ հնչում է որպես արդիական տագնապ... «Նա կյանքից հեռացավ կինոյից նեղացած» հոդվածը ներկայացնում է չիրացված հնարավորությունների դերասան Հովիկ Վանյանին, որի արխիվային լուսանկարը տեղադրված է ամսագրի շապիկին: Պատմական գիտությունների դոկտոր, ՀՀ ԳԱԱ թղթակից անդամ Նիկոլայ Հովհաննիսյանի «Կարծում եմ, որ հայոց ցեղասպանությունը ճանաչել է նաեւ թուրքական պետությունը, մնում է նրանց այսօրվա ղեկավարությունը վավերացնի» հարցազրույցում անվանի գիտնականը նորովի է մեկնաբանում Հայոց ցեղասպանության ճանաչման կնճռոտ խնդիրը: «Դատապարտում են փաստաթղթերը» վերնագրի ներքո հրապարակված են Մեծ Բրիտանիայի, Ֆրանսիայի եւ Ռուսաստանի կառավարությունների 1915 թ. մայիսի 23-ի համատեղ հայտարարությունը, որտեղ նշվում է Արեւմտյան Հայաստանում ապրիլին կատարած ոճրագործությունները: Սա իր նախադեպը չունեցող դիվանագիտական փաստաթուղթ է: Այնուհետեւ հայերենով, անգլերենով, ռուսերենով ներկայացվում են Հայոց ցեղասպանությունը ճանաչած 21 պետությունները իրենց դրոշներով: Կինոռեժիսոր Հայկ Քոչարյանին է նվիրված «Լուսանկարների վերնիսաժ» խորագրի ներքո տպագրված գեղարվեստական լուսանկարները: Թատերական բաժնում այս անգամ տեղ է գտել պետական համազգային թատրոնի «44 աստիճանի վրա» ներկայացումը, որն արդեն տասը տարի հաջողությամբ բեմադրվում է Համազգայինում: Յուրի Հարությունյանը ավելի քան 70 լիամետրաժ, վավերագրական եւ մուլտիպլիկացիոն ֆիլմերի երաժշտության հեղինակ է: «Գողտրիկ երեկո» վերնագրով նյութը ներկայացնում է 70-ը բոլորած անվանի կոմպոզիտորի ստեղծագործական ուղին: «Ֆիլմ թերթի էջերից» խորագրի տակ հրապարակված է կինոռեժիսոր Հենրիկ Մալյանի էսսեն Սերգեյ Փարաջանովի մասին: Մեկ այլ նյութ ներկայացնում է կինոդրամատուրգ եւ ռեժիսոր Առնոլդ Աղաբաբովի ստեղծագործական ճանապարհը: «Վերնիսաժ» բաժնում այս անգամ տեղ է գտել 1980-ականներին ընտանիքով Լոս Անջելես տեղափոխված քանդակագործ Վարդան Օհանյանի գործերը: Քանդակագործ, ում ձեռքում երկաթը, հիրավի, շունչ ու ոգի է ստանում: «Փյունիկ» համահայկական հիմնադրամի պատվավոր նախագահ, սիրիահայ գործարար Գաբրիել Չամբերջյանը արդեն մի քանի տարի է, ինչ հովանավորում է «Ոսկե ծիրան» երեւանյան փառատոնը: Նրա հետ տպագրված ասուլիսում բարերարն ասում է, որ կաջակցի ցեղասպանության թեմային նվիրված ֆիլմերի ստեղծմանը: «Թեմա ֆիլմի համար» խորագրի ներքո հրապարակված է «Շենգավիթի վաշտի 14 անմոռաց մարտիկների սխրանքը»: Իսկ «Հայ վրիժառուների արժանի հետնորդները» հարցազրույցում Վազգեն Սիսլյանը մասնավորապես նշում է, որ «Վան» գործողությունը ժամանակին նպաստել է հայկական համայնքի համախմբմանը: «Պատվավոր մրցանակ դերասանին ու ֆիլմին» վերնագրի ներքո երիտասարդ դերասան Արմեն Մուրադյանը ներկայացնում է իրեն եւ «Արտիստ» կարճամետրաժին շնորհած մրցանակի պատմությունը: «Պրեմիերա» խորագրով ինֆորմացիան անդրադառնում է ռեժիսորներ Ռուբեն եւ Վահե Գեւորգյանցների նոր` «Կանանց մոլորակը» կինոնկարի առաջին ցուցադրությանը`«Մոսկվա» կինոթատրոնում: «Երրորդ «Հայակից» հետո...» հարցազրույցը մտորումներ են Հայասատնի ազգային կինոկենտրոնի տնօրեն Գեւորգ Գեւորգյանի հետ: «Այսպես ասած` հեղինակային կինոն մեր կինոյի տունը քանդում է» նշանաբանն է կրում պարբերականում տպագրած երրորդ կլոր սեղանը: Ինչպես նախորդ, այս անգամ նույնպես հետաքրքրական նյութեր են հրապարակված նաեւ ռուսական բաժնում: Ավանդույթի համաձայն ամեն անգամ նշում էինք, որ «+Կինո» ամսագրի հերթական համարը կարող եք ձեռք բերել մամուլի կրպակներից: Սակայն Հայաստանի կինեմատոգրաֆիստների միության վարչության որոշման համաձայն`այսուհետ մեր պարբերականը հանրապետության մշակույթի կենտրոններին, ինչպես նաեւ բոլոր նրանց, ովքեր 6 տարի շարունակ անընդմեջ եղել են «+Կինոյի» ընթերցողները, կտրվի անվճար: *) Եվս մեկ փաստ, որի համար պետք է մեղադրել խմբագիրներին ու հրատարակիչներին ,որոնք վարժեցրին ընթերցողին ձրի, անվճար ստանալ ինֆորմացիան, մամուլն ու գիրքը, արժեզրկելով սեփական աշխատանքը: «Ազգ»: Հավելենք, որ «+Կինո» ամսագիրը մշակութային պլատֆորմ է, որտեղ կողք-կողքի հանդես են գալիս ավագ եւ երիտասարդ սերնդի արվեստագետները: | 
