ԿՅԱՆՔԻՑ ՀԵՌԱՑԵԼ Է ՄԵՁՈ-ՍՈՊՐԱՆՈ ԱՐՓԻՆԵ ՍԱՆՈՒՔՅԱՆ-ԲԵՐԲԵՐՅԱՆԸ Հ. Ծ. 83 տարեկանում տանը քնած ժամանակ վախճանվել է օպերային ճանաչված երգչուհի, մեձո-սոպրանո Արփինե Սանուքյան-Բերբերյանը, տեղեկացնում է «Արմինյն Միրոր-Սփեքթեյթր» շաբաթաթերթը: Արփինեն բազմավաստակ երգահան Համբարձում Բերբերյանի հարսն էր: Ծնվել էր Բեյրութում 1930 թվի նոյեմբերի 26-ին: Հայկական ավետարանական քոլեջն ավարտելուց հետո նա որոշել է զբաղվել երաժշտությամբ եւ ընդունվել է Բեյրութի ազգային երաժշտանոցը: Վոկալ կատարողական արվեստում մասնագիտացել է Երեւանի Կոմիտասի անվան կոնսերվատորիայում, որն ավարտելուց հետո մեձո-սոպրանոյի իր բնատուր տվյալները կատարելագործել է Փարիզի ազգային երաժշտանոցում եւ «Էկոլ նորմալ դը մյուզիքում»: Արժանացել է մի շարք երաժշտական կրթաթոշակների: 1967-ին տեղափոխվել է Մ. Նահանգներ եւ Բոստոնում հանդիպել իր ապագա ամուսնունՙ ջութակահար Հրաչ Բերբերյանին: 1967-ին նրանց առաջարկվել է պաշտոնավարել Բրուքինգզի Հարավային Դակոտա պետական համալսարանում: Բազմաթիվ մենահամերգներ է տվել, հանդես է եկել «Կարմեն», «Աիդա», «Ռիգոլետտո» եւ այլ օպերաներում, որոնցում դերերգերը կատարել է հայերեն, իսպաներեն, անգլերեն, ֆրանսերեն, ռուսերեն, գերմաներեն եւ իտալերեն լեզուներով: Նա նաեւ հմուտ դասախոս ու դաստիարակ է եղել: Արժանացել է բազմաթիվ մրցանակների, որոնց թվում նաեւ երաժշտության ասպարեզում երիտասարդներ պատրաստելու 25-ամյա ծառայության համար պատվավոր մրցանակինՙ Հարավային Դակոտայի կրթական ասոցիացիայի կողմից: | 
