ԳԵՂԱՆԿԱՐԻՉ ՀԱՐՈՒԹՅՈՒՆ ԹՈՐՈՍՅԱՆԸՙ BIAF-Ի ՄՐՑԱՆԱԿԱԿԻՐ Մ. Բ. Լիբանանի գիտության եւ արվեստի ասպարեզներում հեղինակություն վայելող տասնհինգ մտավորականներ 2012-ի Բեյրութի միջազգային մրցանակների երրորդ փառատոնի (BIAF) հաղթողներ հռչակվեցին: Նրանց մեջ միակ հայը եւ միակ նկարիչը մեր հայրենակից Հարություն Թորոսյանն էր, որի արվեստի մասին «Ազգի» էջերում բազմիցս է գրվել: Ինչպես տեղեկանում ենք «Զարթօնք» օրաթերթից, Բեյրութի «Պիել» կենտրոնի «Պավիլյոն Ռուայեալ» սրահում տեղի է ունեցել մրցանակակիրների մեծարանքի երեկո` ավելի քան հազար հրավիրյալների, նաեւ Լիբանանի կրթության եւ մշակույթի նախարարի մասնակցությամբ: Ըստ կարգի, մրցանակակիրները հրավիրվել են բեմ եւ հաղթանակը խորհրդանշող արձանիկը ստանալուց հետո, սրտի խոսք ասել: Նույնկերպ եւ Հարություն Թորոսյանը, որն իր շնորհակալական խոսքում անդրադառնալով հատկապես նկարչական արվեստին, ասել է. «Եթէ գիտութիւնը իր խօսքը կ՚ուղղէ մարդու մտքին, արուեստը, իր հերթին, ըլլալով մտաւոր աշխատանքի մը արդիւնքը, կը պեղէ մարդ էակի զգացական աշխարհը: Վստահաբար նոյնն է պարագան նկարչութեան եւ արուեստի միւս մարզերուն համար»: Մրցանակակիրներին հաջորդ օրն իր նստավայրում ընդունել է Լիբանանի նախագահ Միշել Սլեյմանը, ծանոթանալով նրանցից յուրաքանչյուրին, շնորհավորել եւ ասել է. «Լիբանանը մշակույթի եւ քաղաքակրթության երկիր է եւ այսօր էլ հավատում է այդ արժէքներին եւ նկատում է դրանք ժողովուրդների փոխըմբռնման եւ բարեկամության խորհրդանիշ: Լիբանանը հպարտ է իր զավակների կարողություններով: Մեր հայենիքը յուրահատուկ տեղ ունի ազգերի պատմության մեջ, մարդկային քաղաքակրթությանը բերած իր նպաստով, սկսածՙ գրերի գյուտից, որ անցնելով Հունաստանիցՙ լուսավորել է լատինական եւ եվրոպական երկրները: Շնորհավորում եմ ձեզ ու շնորհակալ եմ Լիբանանին մատուցած ձեր ծառայությունների համար»: | 
