ՊՐԱՀԱՅԻ ՀԱՅԿԱԿԱՆ «ԳԵՆԵՐԱԼԸ» ՍԵՆՍԱՑԻՈՆ ՀԱՋՈՂՈՒԹՅԱՆ Է ՀԱՍԵԼ «ՕՐԵՐ» եվրոպական ամսագիր, Orer.eu Չեխիայի, Եվրոպայի եւ աշխարհի լավագույն հյուրանոցներից մեկը 2007 թվականից Պրահայում գործող հայտնի գործարար Աղասի Զավարյանի «Գեներալ» հյուրանոցը փոքր հյուրանոցների անվանակարգում միջազգային հեղինակավոր «Tripadvisor.co.uk» կայքէջի կողմից լավագույնն է ճանաչվել ոչ միայն Չեխիայում, այլեւ Եվրոպայումՙ ստանալով առաջին եւ երրորդ տեղերը: Իսկ աշխարհում «Գեներալը» գրավել է 7-րդ տեղը: «Ճամփորդների նախընտրություն 2013» (Travellers Choice 2013) մրցանակը տրվում է ամեն տարիՙ նկատի ունենալով աշխարհի տարբեր երկրների զբոսաշրջիկների տված գնահատականները: «Գեներալ» հյուրանոցի պարագայում հաշվի են առնվել ոչ միայն հյուրանոցի անձնակազմի մատուցած որակյալ ծառայությունները, այլեւ առաջարկվող զբոսաշրջային տեսարժան վայրերի ու ռեստորանների բազմազանությունը: Հինգաստղանի հյուրանոցն առանձնանում է նաեւ իր յուրահատուկ ուղղվածությամբՙ յուրաքանչյուր սենյակ կրում է որեւէ հայտնի զորավարի անուն, այդ թվումՙ մարշալ Հովհաննես Բաղրամյանի: Սենյակների պատերին պրահայաբնակ նկարիչներ հայր եւ որդի Մուրադյանների աշխարհի հայտնի 20 զորավարների դիմանկարներն են: Հիշեցնենք, որ «Գեներալը» աննախադեպ հաջողություն է գրանցել նաեւ մեկ ամիս առաջ, մեկ այլ հայտնիՙ hotel.info ինտերնետային կայքէջի օգտատերերի քվեարկությամբ հյուրանոցը ճանաչվեց Չեխիայի լավագույն հյուրանոց, իսկ Եվրոպայումՙ երրորդը: Ըստ նույն կայքէջի, հյուրանոցում իջեւանած հյուրերի 97 տոկոսն ընկերներին անվերապահորեն խորհուրդ են տալիս մնալ այս հյուրանոցում: Ընդ որումՙ գնահատելիս հաշվի են առել ե՛ւ սենյակների որակն ու մաքրությունը, ե՛ւ անձնակազմի բարեհաճ վերաբերմունքը, գնային քաղաքականությունը, նախաճաշի որակը, ե՛ւ նույնիսկ հյուրանոցում առկա աղմուկի աստիճանը: Կայքէջում գրանցված են 5 միլիոնից ավելի հաճախորդներ աշխարհի տարբեր երկրներից: «Օրեր»-ի հետ զրույցում Չեխիայում ՀՀ դեսպան Տիգրան Սեյրանյանն ասաց. «Սա մեզ համար մեծ նվաճում է եւ հպարտություն»: Հյուրանոցի կայքէջն է ՙ WWW.HOTEL-GENERAL-COM | 
