ՆՅՈՒ ՅՈՐՔՈՒՄ ՑՈՒՑԱԴՐՎԵԼ Է «ԺՈՂՈՎՐԴԻ ԹՇՆԱՄԻՆ» ՖԻԼՄԸ Հ. Ծ. Նյու Յորքից ստացված մամլո հաղորդագրությունը տեղեկացնում է, որ «Համազգային կրթական եւ մշակութային ընկերության» կազմակերպությամբ հունվարի 27-ին Սբ Գրիգոր Լուսավորիչ հայկական եկեղեցու Փաշալյան դահլիճում տեղի է ունեցել ռեժիսոր եւ պրոդյուսեր Զարեհ Ճգնավորյանի «Ժողովրդի թշնամի: Հայերը հիշում են ստալինյան շրջանի տեռորը» վավերագրական ֆիլմի ցուցադրությունը: Օրվա հանդիսավար, Համազգայինի Նյու Յորքի մասնաճյուղի ատենապետ դոկտ. Արա Գաբրիելյանը ներկայացրել է ֆիլմի ռեժիսորին, ասելով, որ նա ծնվել է Ֆարգոյում (Հյուսիսային Դակոտա, ԱՄՆ), բայց մեծացել եւ շնորհիվ իր հորՙ երգահան եւ դիրիժոր Լորիս Ճգնավորյանի շրջագայությունների, կոսմոպոլիտ մթնոլորտում, ապրելով Իրանում, Գերմանիայում, Ֆրանսիայում, Անգլիայում, ԱՄՆ-ում եւ Հայաստանում: Ավարտել է (1992-ին) Նյու Յորքի համալսարանի արվեստի բաժինը: Էրիկ Պողոսյանի ներածականով ֆիլմը արդեն մեծ ճանաչում է ձեռք բերել միջազգային շրջանակներում: Ամերիկյան հայտնի «Նեշնըլ ջեոգրաֆիկ մեգեզին» հանդեսը Հայաստանի մասին երեք «պարտադիր» ֆիլմերի ցուցակում է ընդգրկել Փարաջանովի «Նռան գույնը» եւ Էգոյանի «Արարատ» ֆիլմերի հետ: Արխիվային նյութերի վրա հիմնված ֆիլմը բացվում է Ստալինի թաղման արարողությամբ, որի ընթացքում հնչում է բռնապետի խոսքը. «Մեկ մարդու մահը ողբերգություն է, միլիոնների մահըՙ սոսկ վիճակագրություն»: Հիսունութ րոպե տեւողությամբ ֆիլմը մոտ 200 հարցազրույցների արդյունք է, նկարահանված Խորհրդային Միության ամենահեռավոր անկյուններում, որտեղ աքսորել էին հայերին: Ֆիլմի ցուցադրությունից հետո տեղի ունեցած հարց ու պատասխանի բաժնում Զարեհ Ճգնավորյանը խոստովանել է, որ ստիպված է եղել ֆիլմի որոշ հատվածներ մոնտաժել հանրային հեռուստատեսությամբ հեռասփռելու նպատակով: «Այժմ այլ կերպ կնկարահանեի այդ ֆիլմը», ասել է նա: Երեկոյի վերջում Հայր Մեսրոպ Լակիսյանը շնորհավորել է ռեժիսորին եւ նրան նվիրել Անթիլիասում Հայոց ցեղասպանության հուշարձան-կոթողի մանրաքանդակը: | 
