ԻՈՍԻՖ ԿՈԲԶՈՆԸ` ԲԱՐԵԳՈՐԾԱԿԱՆ ԱՅՑՈՎ ԳՅՈՒՄՐԻՈՒՄ Գ. Մ. Փողային գործիքներ` քաղաքի 4-րդ երաժշտական դպրոցին Անցած շաբաթ օրը բարեգործական առաքելությամբ Գյումրի էր այցելել խորհրդային եւ ռուսական էստրադայի հանրաճանաչ վարպետ, ՌԴ ժողովրդական արտիստ, նաեւ Ռուսաստանի Պետդումայի պատգամավոր Իոսիֆ Կոբզոնը: Անցած տարվա նոյեմբերի 22-ին, իր 75-ամյակի առթիվ Երեւանի Արամ Խաչատրյան համերգասրահում տեղի ունեցած «Ես սիրում եմ քեզ, կյանք» բարեգործական համերգից ստացված ողջ հասույթը անվանի երգիչը խոստացել էր տրամադրել Գյումրու արվեստի դպրոցներին` երաժշտական գործիքներ ձեռք բերելու նպատակով: Այժմ նա եկել էր խոստումը կատարելու: Պատվավոր հյուրը, որն այստեղ էր ժամանել տիկնոջ եւ «Սոզվեզդիե» («Համաստեղություն») միջազգային բարեգործական հիմնադրամի ներկայացուցիչների հետ, քաղաքի մուտքի մոտ աղ ու հացով, փողային նվագախմբի հնչյունների ներքո դիմավորումից հետո հյուրընկալվել է Գյումրու քաղաքապետարանում, այցելել «Պատվո բլուր» հուշամալիր, հարգանքի տուրք մատուցել նաեւ երկրաշարժի զոհերի հուշակոթողին: Սա Իոսիֆ Դավիդովիչի հերթական այցն էր Գյումրի. նա հայ ժողովրդի կողքին եղել է եւ 88-ի ավերիչ երկրաշարժին հաջորդող օրերին, եւ հետագայում անմիջական աջակցություն ցուցաբերել ծանր պայմաններում ապրող աղետյալներին: Այցի հիմնական արարողությունը տեղի է ունեցել «Հոկտեմբեր» կինոթատրոնի սրահում: Գյումրու 4-րդ երաժշտական դպրոցը նվեր է ստացել 3 մլն 622 հազար դրամ ընդհանուր արժողությամբ փողային գործիքներ: Քաղաքապետ Սամվել Բալասանյանը աշխարհահռչակ երգչին պարգեւատրել է Գյումրու քաղաքապետարանի հուշամեդալով: Իոսիֆ Կոբզոնը հավաքվածներին հաճելի պահեր է պարգեւել իր երգացանկից կատարումներով, հայաստանյան առաջիկա ընտրությունների հետ կապված` հաջողություններ մաղթել նախագահ Սերժ Սարգսյանին: | 
