ԿԱՐԵԼԻ Է ՍՏԵՓԱՆԱԿԵՐՏԻՑ ՆԱԵՎ ՆՅՈՒ ՅՈ՞ՐՔ ԹՌՉԵԼ... Վ. Պ. Հայաստանի նախագահի ընտրություններից հետո տարածաշրջան են այցելելու ԵԱՀԿ Մինսկի խմբի համանախագահները: Այդ մասին տեղեկություն է տարածել ադրբեջանական «Ազերիպրես» գործակալությունը` հղում անելով Ադրբեջանի արտգործնախարար Էլմար Մամեդյարովին: Վերջինս երեկ ասուլիսում տեղեկացրել է, թե Փարիզում հունվարին տեղի ունեցած Ադրբեջանի եւ Հայաստանի արտգործնախարարների հանդիպմանը ԵԱՀԿ Մինսկի խմբի համանախագահները «ԼՂ հակամարտության կարգավորման մասով առաջարկներ ու տեսակետներ են հնչեցրել»: Համանախագահները կլինեն տարածաշրջանում հայաստանյան նախագահական ընտրություններից հետո, ինչպես նաեւ արդեն աշնանը Ադրբեջանում սպասվող նախագահի ընտրություններից հետո` թերեւս պահպանելու բանակցային գործընթացի ընդհանրական ընթացքը: Ասել է թե համանախագահները ամեն ջանք գործադրում են, որպեսզի բանակցությունները գոնե որպես հանդիպումների ձեւաչափ մնան գործողության մեջ այն դեպքում, երբ Ադրբեջանում, օրինակ, Ստեփանակերտի օդանավակայանի առնչությամբ, չեն կարողանում հիստերիկ հռետորաբանությունը փոխել: Այդ մասին կրկին հիշեցրել է նույն ինքը` համանախագահների այցի մասին տեղեկություն տրամադրած արտգործնախարար Էլմար Մամեդյարովը: Ադրբեջանի ԱԳ նախարարի հայտարարության համաձայնՙ «Թող Հայաստանը դուրս բերի իր զինուժը Լեռնային Ղարաբաղից, իսկ հետո, եթե հարկ լինի, կարելի է անգամ Նյու Յորք թռիչք կազմակերպել»: Այնպիսի տպավորություն կարող է ստեղծվել, թե ադրբեջանական կողմը որոշ առումով փոխել է արցախյան օդանավակայանի գործունեւթյան առնչությամբ օգտագործվող բառապաշարը` ինչ-որ պայման առաջ քաշելով: Սակայն ակնհայտ լինելով հանդերձ, որ Հայաստանին նման պահանջ ներկայացնելը անհեթեթություն է, հստակ է, որ Ադրբեջանն այժմ փորձ է արել ոչ թե սպառնալիքներով խոսել, այլ անցնել վերջնագրային պայմաններին, որոնք հաստատապես իրագործելի չեն: Կարելի է ենթադրել, որ որքան էլ հոռետեսական լինեն միջազգային հանրության կողմից դատապարտման կարեւորությանը չվստահողների դիրքորոշումները, Ստեփանակերտի օդանավակայանի հարցում ինքնաթիռներ կործանելու սպառնալիքի դեմ արտահայտվածների խոսքը կարծես տեղ է հասել... | 
