ԱՄՆ. ՔՎԵԱՐԿՈՒԹՅՈՒՆԸ ԹԵԵՎ ՀԱՆԳԻՍՏ ԷՐ, ԲԱՅՑ... Վ. Պ. «Միացյալ Նահանգները շնորհավորում է հայ ժողովրդին փետրվարի 18-ի ընտրությունների կապակցությամբ, որոնք միջազգային դիտորդների գնահատականներով ընդհանուր առմամբ լավ էին կազմակերպված եւ բնութագրվել են հիմնարար ազատությունների հանդեպ հարգանքով», փետրվարի 20-ին մամուլի հայտարարությամբ հանդես է եկել ԱՄՆ պետքարտուղարության մամուլի խոսնակ Վիկտորիա Նյուլանդը : Նա նշել է նաեւ ԵԱՀԿ ԺՀՄԻԳ-ի` հայաստանյան մամուլի առնչությամբ հնչեցրած որակումն առ այն, որ մամուլը կատարել է իր պարտականությունը` ապահովելով հավասարակշռված լուսաբանում, ընդ որում` ազատ եթերի օգտագործմամբ: «Այդուհանդերձ, մենք համամիտ ենք ԵԱՀԿ ԺՀՄԻԳ արտահայտած մտահոգություններին հանրային կառավարման առումով անկողմնակալության պակասի եւ վարչական ռեսուրսների չարաշահման առնչությամբ, ինչը հանգեցրել է պետության ու իշխող կուսակցության գործողությունների տարանջատման լղոզմանը` ինչպես նախընտրական շրջանում, այնպես էլ քվեարկության օրը», նշել է Նյուլանդը: Այս համատեքստում էլ ԱՄՆ պետքարտուղարության ներկայացուցիչն ընդգծել է, որ ԱՄՆ-ը համաձայն է այն բացահայտումներին, ըստ որոնց քվեարկության օրը թեեւ անցել է հանգիստ ու նորմալ, սակայն դիտարկվել են վստահված անձանց կողմից լիազորությունների չարաշահման, նաեւ լուրջ այլ խախտումներ` ընդհուպ ընտրողների վրա ճնշումներ: «Միացյալ Նահանգները շարունակելու է դիտարկել միջազգային եւ տեղական դիտորդների բացահայտումները, ինչպես նաեւ ընտրական բողոքների քննությունները արդեն հետընտրական շրջանում: Իրավապահ մարմիններին մենք կոչ ենք անում հետաքննել եւ համապատասխան քայլեր ձեռնարկել ընտրախախտումների մասին հավաստի տեղեկություններին ի պատասխան: Մենք նաեւ բոլոր կողմերին կոչ ենք անում հանգստություն պահպանել հետընտրական շրջանում եւ զսպվածություն դրսեւորել իրենց հետագա գործողություններում», ասվում է Նյուլանդի մամուլի հաղորդագրության մեջ: | 
