9,1 ՏՈԿՈՍ ՏՆՏԵՍԱԿԱՆ ԱԿՏԻՎՈՒԹՅԱՆ ԱՃԸ ՀՈՒՆՎԱՐԻՆ ԱՐԱ ՄԱՐՏԻՐՈՍՅԱՆ Արդյունաբերության ծավալներն աճել են 18,8 տոկոսով Հայաստանի ազգային վիճակագրական ծառայությանը հրապարակած 2013-ի առաջինՙ հունվար ամսվա սոցիալ-տնտեսական ցուցանիշների համաձայն, Հայաստանի տնտեսական ակտիվության ցուցանիշը (ՏԱՑ) կազմել է 9,1 տոկոս: Տնտեսության գրեթե բոլոր ճյուղերում 2013-ի հունվարին 2012-ի հունվարի նկատմամբ աճ է արձանագրվել, իսկ նախորդ տարվա դեկտեմբերի նկատմամբ` անկում: Ինչը բնական է, քանի որ դեկտեմբերին տնտեսական ակտիվությունը անհամեմատ բարձր է լինում, քան հունվարին, եւ այս երկու ամիսների համադրմամբ երբեք եզրակացություններ չեն արվում: Ամենամեծ աճն արձանագրվել է արդյունաբերությունում` 18,8 տոկոս նախորդ տարվա հունվարի համեմատ եւ 21,1 տոկոսով նվազումՙ դեկտեմբերի նկատմամբ: էլեկտրաէներգիայի արտադրությունը աճել է 6 տոկոսով, դեկտեմբերի նկատմամբ նվազել 0,7 տոկոսով: Ծառայությունների ոլորտում անցյալ տարվա հունվարի նկատմամբ 7,5 տոկոս աճ է արձանագրվել, իսկ դեկտեմբերի նկատմամբ` 20 տոկոս անկում: Մանրածախ առեւտրում 2013-ի հունվարին 2012-ի հունվարի նկատմամբ արձանագրվել է 5,7 տոկոս աճ, իսկ դեկտեմբերի նկատմամբ` 67,7 տոկոս անկում: Գյուղատնտեսության արտադրանքի ծավալը աճել է 2,1 տոկոսով, իսկ դեկտեմբերի նկատմամբ նվազել 67,7 տոկոսով: Միայն շինարարությունն է, որ հունվարին անկում է արձանագրել 2012-ի հունվարի նկատմամբ` 17,6 տոկոսով, իսկ դեկտեմբերի նկատմամբ անկումը կազմել է 91,9 տոկոս: Արտաքին առեւտրաշրջանառությունը 2013-ի հունվարին 2012-ի հունվարի նկատմամբ ավելացել է 21,7 տոկոսով եւ կազմել 422,5 մլն դոլար, իսկ դեկտեմբերի նկատմամբ նվազել 25,1 տոկոսով: Արտահանումը կազմել է 112,4 մլն դոլար, արձանագրելով կտրուկ` 54,6 տոկոս աճ, իսկ 2011-ի դեկտեմբերի նկատմամբ` 17,3 տոկոսով նվազում: Ներմուծումը կազմել է 310,2 մլն դոլարՙ աճելով 13 տոկոսով, իսկ 2011-ի դեկտեմբերի նկատմամբ նվազելով 27,6 տոկոսով: Արտաքին առեւտրի բացասական հաշվեկշիռը կազմել է 197,8 մլն դոլար: Միջին ամսական աշխատավարձը Հայաստանում հունվարին կազմել է մոտ 140 հազար դրամ, մասնավոր հատվածում կազմել է 168 հազար դրամ, պետականումՙ 112 հազար դրամ: |
