ԻՆՉՈ՞Ւ Է ՉԵՂՅԱԼ ՀԱՅՏԱՐԱՐՎԵԼ «ԴՈՐԻԱՆՍ» ԵՎ «ՌԵԻՆԿԱՐՆԱՑԻԱ» ԽՄԲԵՐԻ ՀԱՄԵՐԳԸ Մ. Հ. Մոսկվայում` Կրեմլի պետական պալատում կայանալիք «Դորիանս» եւ «Ռեինկարնացիա» խմբերի համերգը չի կայանա: Երեկ «Դորիանս» խմբի վարչությունը հանդես է եկել հայտարարությամբ, որում ասվում է. «Ապրիլի 11-ին հայտարարված «Դորիանսի» համերգը Մոսկվայում չի կայանա կազմակերպչի մեղքով, որը չի ապահովել անհրաժեշտ պայմանները խմբի ելույթի համար: Համերգից մեկ շաբաթ առաջ կազմակերպիչը հայտնել է այն չեղյալ հայտարարելու մասին, ինչը ոչ պրոֆեսիոնալ վերաբերմունքի ակնհայտ դրսեւորում է: «Դորիանսն» իր անունից ներողություն է խնդրում Մոսկվայի իր երկրպագուներից, որոնք ակնկալում էին հանդիպել սիրելի խմբին»: «Ազգը» ցանկացավ հավելյալ տեղեկատվություն ստանալ, թե մոսկովյան համերգի կազմակերպիչները ո՞ր անհրաժեշտ պայմանները չեն ապահովել խմբի ելույթի համար: Մեր հարցին ի պատասխան «Դորիանս» խմբի պրոդյուսեր Արա Թադեւոսյանը հրաժարվեց հավելյալ մեկնաբանություն տալ, ասելով. «Ինչ ցանկանում էինք ասել, հաղորդագրության միջոցով ասել ենք, հավելյալ ոչինչ չենք ցանկանում ավելացնել»: Այդպես էլ հասկանալի չէր, թե մասնավորապես ի՞նչ պայմանների մասին է խոսքը, որ համերգի կազմակերպիչները չեն ապահովել: Սակայն «Ազգն» իր մոսկովյան աղբյուրներից ճշտեց, որ համերգի տոմսերի նույնիսկ կեսը չի վաճառվել եւ հավանաբար դա էլ համերգի չեղյալ հայտարարելու պատճառն է դարձել: | 
