ՄՈՎՍԻՍՅԱՆԻ ԳՈԼՆ ԷԼ ՉՓՐԿԵՑ «ՍՊԱՐՏԱԿԻՆ» Յուրա Մովսիսյանը «Սպարտակի» կազմում ընթացիկ մրցաշրջանում 6-րդ գոլը խփեցՙ «Զենիթի» հետ խաղի 71-րդ րոպեին հավասարեցնելով հաշիվը (2-2): Սակայն այդ գոլը չօգնեց «Սպարտակին» միավոր վաստակելու, քանի որ մինչեւ խաղավարտ դաշտի տերերը եւս 2 անգամ գրավեցին հյուրերի դարպասն ու 4-2 հաշվով անչափ կարեւոր հաղթանակ տոնեցին: «Զենիթը» 26 միավորով գլխավորեց աղյուսակը, իսկ «Սպարտակը» 23 միավորով նահանջեց 2-րդ հորիզոնական: Յուրա Մովսիսյանն այժմ 2 գնդակով է զիջում ՌԴ առաջնության լավագույն ռմբարկուների ցանկը գլխավորող «Զենիթի» հարձակվող Դանիին: 7 գոլի հեղինակ է «Ռոստովի» հարձակվող Արտյոմ Ձյուբան: Անհանգստացնում է այն փաստը, որ Հայաստանի հավաքականի անդամներ Մարկոս Պիզելին եւ Կառլեն Մկրտչյանը տեղ չեն զբաղեցնում իրենց թիմերի կազմերում: 11-րդ տուրում «Կրասնոդարը» 1-0 հաշվով հաղթեց «Ռուբինին» եւ կրկին Մարկոսը մնաց պահեստայինների նստարանին: Ժամանակին Մարկոսը «Կուբանից» «Կրասնոդար» տեղափոխվեց, որպեսզի ավելի շատ խաղաժամանակ ստանա, սակայն նոր թիմում բրազիլացի ֆուտբոլիստի գործերն ավելի վատ են դասավորվում: Կառլեն Մկրտչյանն էլ Դոնեցկի «Մետալուրգից» տեղափոխվելով «Անժի», հաճախ է հայտնվում պահեստայինների թվում: «Անժին» սեփական հարկի տակ ոչ-ոքի (2-2) խաղաց «Ամկարի» հետ, իսկ Մկրտչյանը խաղին չմասնակցեց: Եթե այս ամենին ավելացնենք նաեւ Ռոման Բերեզովսկու հազվադեպ ելույթները Մոսկվայի «Դինամոյում», ապա տխուր պատկերն ավելի ամբողջական կլինի: | 
