ՀԱՅԵՐԻ ԾԱԳՄԱՆ ԽՈՐԵՆԱՑԻԱԿԱՆ ԹՎԱԿԱՆԸ ԱՐԺԱՆԱՀԱՎԱՏ Է Հ. Ծ. Գիտական հոդվածների հրատարակման «bioRxiv» թվային գրադարանի կայքում զետեղված զեկույցից պարզ է դարձել, որ միջնադարյան պատմագրության խոշորագույն ներկայացուցիչ, հայ պատմագրության հայր Մովսես Խորենացու հայ ժողովրդի ծննդաբանությանը վերաբերող 2492 մ.թ.ա. թվականը, որ ցարդ համարվում էր առասպելախառն, լիովին արժանահավատ է: Այս մասին գրել է Նիկոլաս Ուեյդը «Նյու Յորք Թայմսում»: Ծագումնաբանական հարցերով զբաղվող մասնագետներ տեսագրման (scanning) միջոցով հետազոտել են գեները 173 հայերի (Հայաստանից եւ Լիբանանից), համեմատել դրանք 78 այլ ազգերի ներկայացուցիչների հետ եւ հաստատել, որ հայերը կազմավորվել են մ.թ.ա. 2000-3000 թվականներին եւ նրանց հետնորդները այժմ ապրում են Կենտրոնական Ասիայում, Սարդինիայում եւ այլուր: Կազմավորումը սկսվել էր բրոնզե դարի վերջերին, երբ առեւտուրի եւ տեղաշարժերի աշխուժություն էր նկատվում: Երբ մ.թ.ա. 1200-ին արեւելյան Միջերկրականի քաղաքակրթությունը հանկարծակի փլուզվեց, հայերը անջատվեցին մյուս ժողովուրդներից եւ սկսեցին առանձին ձեւավորվել: Այդ անջատումը պայմանավորված էր հայերին հատկանշական որոշակի գործոններով: Ծագումնաբան մասնագետների խումբը ղեկավարել են Քեմբրիջի (Անգլիա) մոտակայքում գտնվող «Sanger» ինստիտուտի աշխատակիցներ Մարկ Հաբերը եւ Քրիս Թայլեր-Սմիթը: | 
