ԿՈՆԳՐԵՍԸ ՕԲԱՄԱՅԻՆ ՀՈՐԴՈՐՈՒՄ Է ԶԻՆԵԼ ՈՒԿՐԱԻՆԱՅԻՆ Պ. Ք. ԱՄՆ Կոնգրեսի ստորին պալատը ընդունել է բանաձեւ Կիեւի իշխանություններին զենքի մատակարարումներ սկսելու անհրաժեշտության մասին: Փաստաթղթի օգտին քվեարկել են 348, դեմՙ 48 օրենսդիրներ: Նախաձեռնությունը պաշտպանել են ինչպես հանրապետականները, այնպես էլ դեմոկրատները, հաղորդում է ԻՏԱՌ-ՏԱՍՍ-ը: Կոնգրեսականները նախագահ Օբամային հորդորել են Ուկրաինային տրամադրել պաշտպանական զենքի համակարգեր: Մոսկվան ամերիկյան զենքի հնարավոր մատակարարումները գնահատել է որպես Մինսկի համաձայնությունների կատարումը ձախողելու եւ Ուկրաինայի արեւելքում հակամարտությունը խորացնելու փորձ: Դաշնության խորհրդի միջազգային գործերի կոմիտեի փոխնախագահ Վլադիմիր Ջաբարովը ՌԻԱ գործակալությանը տված հարցազրույցում ասել է. «Այդ բանաձեւն ունի ոչ թե պարտադրական, այլ հանձնարարական բնույթ: Որոշում պետք է ընդունի նախագահը: Կարծում եմՙ Օբաման չի դիմի այդ քայլին, քանի որ հասկանում է Ուկրաինայի հարավ-արեւելքում հակամարտության խորացման վտանգը: Հուսով եմՙ եվրոպացի խորհրդականները կկարողանան տարհամոզել: Եթե նա դիմի այդ քայլին, ապա հարկ կլինի մոռանալ Մինսկի համաձայնությունները»: | 
