ԱՇՆԱՆԸ ՍՅՈՒՆԻՔԻ ԱԶԱՏ ՏՆՏԵՍԱԿԱՆ ԳՈՏԻՆ ԿԳՈՐԾԻ Ա. Մ. Վարչապետ Կարեն Կարապետյանի մոտ երեկ կայացած խորհրդակցության ժամանակ տնտեսական զարգացման եւ ներդրումների նախարար Սուրեն Կարայանը զեկուցել է, որ ՀՀ առեւտրաարդյունաբերական պալատի եւ «Սյունիք ազատ տնտեսական գոտի» ՍՊԸ ներկայացուցիչների հետ քննարկման արդյունքում նախատեսվում է ստեղծել Սյունիքի ԱՏԳ կազմակերպիչ ընկերություն: Կարեն Կարապետյանին մանրամասներ են ներկայացվել ԱՏԳ ձեւավորման քայլերի, պետություն-մասնավոր համագործակցության բանաձեւի, կազմակերպման առաջին փուլի եւ ծրագրի իրականացման ռիսկերի կառավարման վերաբերյալ: Նշվել է, որ 1-ին փուլի աշխատանքների համար նախատեսվում է ներդնել 2,5-3 մլն դոլար, իսկ շինարարության տեւողության եւ ավարտի ժամկետըՙ սահմանել ՀՀ կառավարության համապատասխան որոշմամբ: Վարչապետը հանձնարարել է արագացնել գործընթացը եւ կառավարության առաջիկա նիստին ներկայացնել Սյունիքում ԱՏԳ ստեղծելու որոշման նախագիծ: Կարեն Կարապետյանը նշել է, որ համապատասխան որոշման ընդունմամբ կառավարությունը կհաստատի ԱՏԳ ստեղծման հայտը եւ կազմակերպչին, իսկ արդեն սույն թվականի աշնանը Սյունիքի ԱՏԳ-ն կսկսի գործել: | 
