ԹԻԼԵՐՍՈՆԸ ՉԻ ՀԵՌԱՆՈՒՄ, ՆԱ ՀԱՆԳՍՏԱՆՈՒՄ Է CNN-ի տեղեկություններով շուտով ԱՄՆ պետքարտուղար Ռեքս Թիլերսոնը հրաժարական է տալու, քանի որ նա տարաձայնություններ ունի նախագահ Թրամփի հետ: Տարաձայնություններն, ընդ որում, մի քանի ուղղության են. Թիլերսոնն, ըստ նույն աղբյուրի, դժգոհ է, քանի որ Սպիտակ տունն իրեն թույլ չի տալիս ինքնուրույն վարել Պետքարտուղարության կադրային քաղաքականությունը: Բացի այդ Թիլերսոնը համաձայն չէ Թրամփի հետՙ Իրանին եւ Մերձավոր Արեւելքին վերաբերող հարցերում: Չմոռանանք նաեւ, որ օրեր առաջ, երբ Թրամփը հրապարակավ քննադատեց ԱՄՆ գլխավոր դատախազին, Թիլերսոնն այդ քննադատությունն անվանեց ոչ պրոֆեսիոնալ: Մի խոսքով, ինչպես նշում են ամերիկյան ԶԼՄ-ները, Սպիտակ տունն ու Պետքարտուղարությունը բաց պատերազմի մեջ են: Պետքարտուղարությունից, սակայն, պարզաբանել են. Ռեքս Թիլերսոնը չի պատրաստվում հրաժարական տալ, նա պարզապես մեկնել է արձակուրդի: Ուրեմն կարելի է պնդել, որ ԱՄՆ պետքարտուղարը հոգնել է: |
