ՇԵՆԱՎԱՆԻ ԳՅՈՒՂԱՊԵՏԸ ՈՐՍԻ Է ԳՆԱՑԵԼ ՀՈՎԻԿ ԱՖՅԱՆ Արմավիրի Շենավան համայնքի ղեկավար 1980-ին ծնված Արթուր Մկրտչյանը օրերս որսի էր գնացել: Որսը բավականին հաջող է անցել, քանի որ դրա ավարտից հետո գյուղապետն ու իր որսորդ ընկերները հրապարակել են լուսանկարՙ իրենք եւ խոցված երկու անգղները: Հա, լուսանկարում նաեւ սպիտակ «Նիվա»-ն է երեւումՙ 04 ԼՏ 048 պետհամարանիշներով: Բայց, որքան էլ նեղանա մեզանից Շենավանի գյուղապետ Արթուրը, որն, իմիջիայլոց հանրապետական է, այս պատմության մեջ կարեւորը անգղներն են: Բանն այն է, որ դրանք սպիտակագլուխ անգղներ են, որը կենդանու վտանգված տեսակ է համարվում: Գրանցված է Բնության պահպանության միջազգային միության Կարմիր ցուցակում, նախկին ԽՍՀՄ եւ Ռուսաստանի, ինչպես նաեւ Հայաստանի Կարմիր գրքերում: Հայաստանում սպիտակագլուխ անգղները հանդիպում են խոշոր ժայռագոյացություններով լեռնազանգվածներումՙ Սյունիքի, Լոռիի, Տավուշի մարզերում: Իհարկե գյուղապետ Արթուրը կարող էր չիմանալ այս ամենի մասին, բայց շենավանցիները հո պե՞տք է իմանան, թե ո՞ւմ են ընտրում իրենց գյուղապետ: |
