ՔԸՐՔ ՔԸՐՔՈՐՅԱՆԻ «ՆՈՐ» ԿԵՆՍԱԳՐՈՒԹՅՈՒՆԸՙ NAASR-ՈՒՄ Հ.Ծ. Առաջիկա փետրվարի 1-ին Բելմոնտի (Մասաչուսեթս) հայկական ուսումնասիրությունների եւ հետազոտությունների ազգային Ասոցիացիայի կենտրոնում (NAASR) վետերան լրագրող Ուիլյամ Ռեմպելը ներկայացնելու է «Խաղամոլը» (The Gambler) վերնագրով իր նոր գիրքը Քըրք Քըրքորյանի մասին: Գրքում 36 տարի «Լոս Անջելես Թայմսում» որպես հետազոտող լրագրող աշխատած լրագրողը, ըստ «Միրոր Սփեքթեյթր» շաբաթաթերթի, պատմում է թե ինչպես ուսումը կիսատ թողած, անգրոշ Քըրքորյանը դարձավ կապիտալիստական աշխարհի պատմության մեջ ամենամեծ գործարարներից մեկը: Ցնցոտիներից մինչեւ հարստության հասնելու ճանապարհին նա ամաչկոտ, ինքնամփոփ անձնավորությունից վերածվեց խիզախ օդաչուի, կինոմագնատի, համարձակ ու ռիսկերից չվախեցող գործարարի, ով վերափոխեց Լաս Վեգասն ու Հոլիվուդը: Ռեմպելը բացահայտող հոդվածներն ու կանխագուշակիչ հետազոտությունները Օսամա բեն Լադենի, ալ Ղաիդայի եւ սուպեր-տանկերի անվտանգության թերությունների մասին տպագրվել են համապատասխանաբար նախքան 2001 թվի սեպտեմբերի 11-ի հարձակումը եւ 1989-ի Էքսոն Վալդեզի աղետը: Նա արժանացել է լրագրողական բազմաթիվ, այդ թվում «Overseas Press Club»-ի եւ «Gerald Loeb»-ի անվան մրցանակների: Պետքարտուղարության հանձնարարությամբ այցելել է Ուկրաինա եւ Վրաստան: | 
