ԿԱՐԵՆ ԿԱՐԱՊԵՏՅԱՆՆ ԱՅՆ ՄԱՐԴՆ Է, ՈՐ ԿԱՐՈՂ Է ՀԱՅԱՍՏԱՆԻ ՏՆՏԵՍՈՒԹՅՈՒՆԸ ԲԵՐԵԼ ՈՐԱԿԱՊԵՍ ՆՈՐ ԱՍՏԻՃԱՆԻ ՎԱՐԴԳԵՍ ԱՐԾՐՈՒՆԻ Հայ իրականության մեջ Հայաստանի Հանրապետության վարչապետի պաշտոնակատար Կարեն Կարապետյանը նոր անուն չէ։ Տնտեսական գործոնեությունը Հայաստանում նա սկսել է ավելի քան 20 տարի առաջ։ 1998-ին նշանակվել է "Հայէներգո" ՓԲԸ գլխավոր տնօրեն, որից հետո, մինչ պետական-քաղաքական գործունեություն սկսելը, կարեւոր դերակատարում է ունեցել անկախ Հայաստանի էներգետիկ ոլորտի զարգացման գործում։ 90-ականների ծանր տարիներին փլուզվեց նաեւ խորհրդային տարիներին կառուցված Հայաստանի գազամատակարարման համակարգըՙ իր ենթակառուցվածներով։ "Հայռուսգազարդի" ստեղծումը նպատակ ուներ վերականգնել Հայաստանի գազամատակարարումը, ինչը նշանակում էր ըստ էության ստեղծել նոր գազամատակարարման համակարգ։ Սկսած 2001-ից, երբ "Հայռուսգազարդի" ՓԲԸ վարչության նախագահ-գլխավոր տնօրեն նշանակվեց Կարեն Կարապետյանը, սկսվեց Հայաստանի վերագազաֆիկացումը։ Կարեն Կարապետյանի ղեկավարությամբ 10 տարվա ընթացքում Հայաստանի գազամատակարարման համակարգն ամբողջությամբ վերակագնվեց, մեր երկիրը դարձավ աշխարհի ամենագազիֆիկացված երկրներից մեկը, որտեղ կապույտ վառելիքից օգտվում է բնակչութան մոտ 95 տոկոսը, ինչպես նաեւ տրանսպորտային միջոցների մեծ մասն անցել է ավելի խնայողական վառելիքովՙ գազով աշխատելուն։ Այդ ընթացքում բարձրացավ նաեւ "Հայռուսգազաարդի" կառավարման արդյունավետությունը, իսկ ընկերությանը շարունակում է մինչ այժմ գլխավորել Հայաստանի խոշոր հարկատուների ցանկը։ 2010-2011 թվականներին Կարեն Կարապետյանը Երեւանի քաղաքապետն էր, նախաձեռնել էր մի շարք բարեփոխումներ, որոնք ուղղված էին Հայաստանի մայրաքաղաքի արդիականացմանը, տրանսպորային համակարգի բարեփոխմանը, նոր ենթակառուցվածների ստեղծմանը եւ Երեւանը ժամանակի բոլոր պահանջներին համապատասխանող քաղաք դարձնելուն։ Նրան հաջորդած քաղաքապետերը շարունակեցին իրենց ջանքերն այդ ուղղությամբ, իսկ Կարեն Կարապետյանը վերադարձավ գազամատակարարման համակարգՙ զբաղեցնելով ռուսաստանյան խոշորագույն ընկերությանըՙ "Գազպրոմին" պատկանող "Գազպրոմբանկ" ԲԲԸ առաջին փոխնախագահի, ապա նաեւ «Գազպրոմ Մեժրեգիոնգազ» ընկերության գլխավոր տնօրենի տեղակալի եւ «Գազպրոմ էներգոհոլդինգ» ՍՊԸ գլխավոր տնօրենի տեղակալի պաշտոնները։ Լինելով բարձրակարգ կառավարիչ, Կարեն Կարապետյանը լուրջ հաջողություններ է արձանագրել այս պաշտոններում, զուգահեռաբար ծավալելով հաջողակ մասնավոր գործունեություն։ Նկատի ունենալով այս ամենը, ինչպես նաեւ հայաստանյան իրականությանը քաջատեղյակ լինելը, 2016-ի սեպտեմբերին Կարեն Կարապետյանը նշանակվեց Հայաստանի Հանրապետության վարչապետ։ Եվ այստեղ նույնպես, տնտեսական չափազանց դանդաղ աճի փուլում գտնվող Հայաստանը, նրա վարչապետության մոտ մեկուսկես տարիների ընթացքում գրանցեց այնպիսի արդյունքներ, որոնք չէին արձանագրվել երկնիշ տնտեսական աճի վերջին տարվանից 2008 թվականից ի վեր։ Այսպես, 2017-ի տարեկան տնտեսական աճը շնորհիվ Հայաստանի վարչապետի թիմի գործադրած ջանքերիՙ բիզնես միջավայրի, հարկային վարչարարության բարելավման եւ ներդրումային բարենապաստ պայմանների կազմեց 7,7 տոկոս։ Ընդ որում, արդյունաբերության աճը կազմեց 12,6 տոկոս, արտահանումն աճեց 25,2 տոկոսով կազմելով աննախադեպ ցուցանիշՙ 2 մլրդ 242 մլն դոլար։ Զբոսաշրջությունը աճեց 20 տոկոսով։ Անգամ 9 տարի շարունակ անկում ապրող շինարարությունն աճ արձանագրեց։ Այս տարվա առաջին եռամսյակի ցուցանիշներն ավելի տպավորիչ էինՙ արդեն երկնիշՙ 10,6 տոկոս տնտեսական աճ, արդյունաբերության 8,2 տոկոս աճ, իսկ շինարարության ծավալներն ավելացան 23 տոկոսով։ Շարունակվեց արտահանման կարելի է ասել թռիչքային աճըՙ 34,4 տոկոս։ Կարեն Կարապետյանի կենսագործունեությունը հուշում է, որ նա հենց այն մարդն է, որ կարող է Հայաստանի տնտեսությունը բերել որակապես նոր աստիճանի, ամրապնդելով նրա անվտանգությունն ու պաշտպանվածությունը, բարձրացնելով բնակչության կենսամակարդակը։ |
