ՔՐԻՍՏՈՆՅԱ ՓԱԽՍՏԱԿԱՆՆԵՐԻ ՄՈՒՏՔԸ ԱՄՆ 50%-ՈՎ ԿՐՃԱՏՎԱԾ Հ.Ծ. Անգլիական «Գարդիան» թերթի լրագրող Ամանդա Հոլպախի հաղորդմամբ Դոնալդ Թրամփի իշխանության օրոք ավելի քան 50 տոկոսով կրճատվել է քրիստոնյա փախստականների մուտքը ԱՄՆ: Նման եզրակացության հիմք է ծառայել օգոստոսի սկզբներին անցկացվող կրոնական ազատությունների խթանմանը նպաստող իր տեսակի մեջ առաջին կոնֆերանսի նախօրյակին պետքարտուղարության հրապարակած զեկույցը: Համաձայն այդ զեկույցի, Թրամփի վարչակազմը 2017-2018 ֆինանսական տարում նախատեսել էր ընդունել ռեկորդային ցածր համարվող ընդամենը 45 հազար փախստական, սակայն մինչեւ այս տարվա հունիսի 30-ը 16.230 փախստական է մուտք գործել Մ. Նահանգներ, որը կազմում է նախատեսվածի 36 տոկոսը: 2016-ի հոկտեմբերից 2017-ի հունիսի 30-ը 23 հազար քրիստոնյաներ էին մտել Մ. Նահանգներ, մինչդեռ 2017-18-ին այդ թիվը ընդամենը 10.955 է: Այս ցուցանիշը, գրում է Հոլպախը, խախտում է Թրամփի նախընտրական խոստումն այն մասին, որ «օգնելու ենք քրիստոնյաներին մուտք գործելու ԱՄՆ»: «Անարդար է, նշել էր նա, որ մահմեդականները ավելի հեշտությամբ են մուտք գործում ԱՄՆ, քան քրիստոնյաները, որոնց գլուխներն են կտրում»: Ընդհանուր առմամբ մահմեդական փախստականների մուտքն էլ կրճատվել է. 2017-ի 21.459-ի փոխարեն 2018-ին (մինչեւ հուինսի 30-ը) միայն 2.421 մահմեդական է մուտք գործել ԱՄՆ, ըստ պետքարտուղարության զեկույցի, որն այդուհանդերձ նշել է, որ 1975-ից սկսած ԱՄՆ-ը ավելի շատ փախստականներ է ընդունել, քան որեւէ այլ երկիր: «Մենք շարունակելու ենք օժանդակել, որ ամենախոցելի խավերը կարողանան վերաբնակվել մեր երկրում, բայց առաջին հերթին հաշվի ենք առնելու ամերիկացի ժողովրդի ապահովությունն ու անվտանգությունը», ամրագրված է զեկույցում: | 
