ՄՈՆՈՕՊԵՐԱ ՀԱՅՈՒՀՈՒ ՄԱՍԻՆ Ա. Բ. Նոյեմբերի 6-ին եւ 7-ին Մոնպելիեի Բեթանիա եկեղեցում եւ Միդլբերիի Թաուն Հոլ թատրոնում (Վերմոնթ, ԱՄՆ) ներկայացվել է ամերիկացի երգահան Էրիք Նիլսենի «Ալիսհայմեր» նոր կամերային մոնոօպերանՙ ըստ ամերիկուհի գրող Դանա Ուոլրաթի համանուն գծավեպի, հրատարակված 2016 թվականին: Վեպի հերոսուհին հեղինակի մայրն էՙ Ալցհայմերից մահացած հայուհի Ալիսը. այդպիսով, Ուոլրաթը վերնագրում խաղարկել է մոր եւ հիվանդության անունները: Ըստ նրաՙ «Ալիսը միշտ գեղեցիկ էր. հայ գաղթականուհիՙ գեղեցիկ, խիտ, սեւ, գանգուր մազերով, ձիթապտղի գույն մաշկով եւ մուգ խոշոր աչքերով»: Նրա դերում հանդես է եկել սոպրանո Մերի Բոնհեգը , նվագակցել է դաշնակահարուհի Էլիսոն Բրյուս Չերուտին : Ամերիկացի հոր եւ հայ մոր զավակ Դանա Ուոլրաթը գրող, նկարիչ եւ մարդաբան է: Ծնվել է Հյուսիսային Քարոլինայում, ուսանել Քոլումբիա համալսարանի Բարնարդ քոլեջում: Որոշ ժամանակ բնակվել է Եմենում, որտեղ դասավանդել է դպրոցում: Փենսիլվանիայի համալսարանում թեզ է պաշտպանել մարդաբանությունից: 2000-ականներին տեղափոխվել է Վերմոնթ, դասավանդել համալսարանի բժշկական քոլեջում: Ժամանակ առ ժամանակ մի քանի ամիս բնակվել է աշխարհի տարբեր երկրներում, նաեւ Հայաստանում: Բացի վերոնշյալ գծավեպիցՙ Ուոլրաթը գրել է «Ես թռչուն եմ» մանկական գիրքը եւ Հայոց ցեղասպանության մասին պատմող «Ինչպես ջուրը քարի վրա» վեպը, նաեւ համահեղինակությամբՙ «Մարդաբանության սկզբունքները» աշխատությունը, որը թարգմանաբար լույս է տեսել պորտուգալերեն: Դանա Ուոլրաթը սերտորեն համագործակցել է երգահան Էրիք Նիլսենի հետ «Ալիսհայմեր» մոնոօպերայի ստեղծման գործումՙ վերջինիս հանձնելով մոր երաժշտական հավաքածուն, ներառյալ մանկության տարիների հայկական երաժշտությունը: |
