ԱՐՈՆՅԱՆԸ ՄՈՏԵՑԱՎ ԱՌԱՋԱՏԱՐՆԵՐԻՆ Վեյք Ան Զեեի շախմատի մրցաշարի 8-րդ տուրում Լեւոն Արոնյանը սպիտակներով հաղթեց աշխարհի նախկին չեմպիոնուհի Հոու Յիֆանին: Դա մրցաշարում Լեւոնի 3-րդ հաղթանակն էր: Մինչ այդ Արոնյանը պարտության էր մատնել Պետեր Լեկոյին ու Իվան Սոկոլովին: 8 տուրից հետո Արոնյանը 5 միավորով 3-4-րդ տեղերն է բաժանում Հիկարու Նակամուրայի հետ: Վերջինս ոչ-ոքի խաղաց Լյուկ վան Վելիի հետ: 6 միավորով առաջատարը Մագնուս Կառլսենն է, որը պարտության մատնեց Սերգեյ Կարյակինին: Առաջատարին կես միավոր է զիջում աշխարհի ներկայիս չեմպիոն Վիշվանաթան Անանդը, որը հաշտություն կնքեց Իվան Սոկոլովի հետ: Երեկ շախմատիստները հանգստանում էին: Այսօր կայանալիք 9-րդ տուրում Արոնյանը սեւերով կմրցի հոլանդացի Էրվին Լ՚Ամիի հետ: Կառլսենի մրցակիցը կլինի Հոու Յիֆանը: B խմբի մրցաշարում հանդես եկող Սերգեյ Մովսիսյանը 8-րդ տուրում ոչ-ոքի ավարտեց պարտիան Սերգեյ Տիվյակովի հետ: Հայ շախմատիստը 5,5 միավորով Յան Թիմանի եւ Ռիխարդ Ռապորտի հետ գլխավորում է աղյուսակը: 5 միավորով առաջատար եռյակին հետապնդում է Արկադի Նայդիչը: C խմբի մրցաշարին է մասնակցում բրազիլահայ գրոսմայստեր Գրիգոր-Սեւակ Մխիթարյանը: Նա 8-րդ տուրում պարտվեց Սաբինո Բրունելոյին: Մխիթարյանը մրցաշարում 2-րդ պարտությունը կրեց: Մինչ այդ նա պարտվել էր Դավիթ Քլեյնին: Բրունելոն Ֆեռնանդո Պերալտայի հետ 6,5 միավորով գլխավորում է աղյուսակը: 5,5 միավորով նրանց հետապնդում է Դավիթ Քլեյնը: | 
