ԱՊՐԻԼՅԱՆ ԱՆԱԿՆԿԱԼՆԵՐ ՖԻԼՀԱՐՄՈՆԻԿԻՑ Մ. Հ. Հայաստանի պետական ֆիլհարմոնիկ նվագախումբը ապրիլ ամսվա ընթացքում հանդես կգա հետաքրքրական համերգաշարով: Այն կսկսվի ապրիլի 12-ին Արամ Խաչատրյան համերգասրահում կայանալիք համերգով, որտեղ կներկայացվեն հայ երեք ժամանակակից կոմպոզիտորների ստեղծագործություններ Լեւոն Չաուշյանի Դաշնամուրի թիվ 1 կոնցերտը, Վահրամ Բաբայանի 8-րդ սիմֆոնիան եւ Դավիթ Սաքոյանի «Նահանջ տարի» ստեղծագործությունը: Դաշնամուրի մենանվագով հանդես կգա երիտասարդ դաշնակահարուհի Աիդա Եսայանը: Իսկ ապրիլի 24-ին, ի հիշատակ 1915թ-ի եղեռնի զոհերի, կկատարեն մեծատաղանդ կոմպոզիտոր Տիգրան Մանսուրյանի «Ռեքվիեմը» եւ «Ասացվածք հոր համար» a capella: Մենակատարներն են Հասմիկ Թորոսյանը (սոպրանո), Դավիթ Բաբայանցը (բարիտոն): Համերգը կղեկավարեն դիրիժորներ Ռոբերտ Մլքեյանը եւ Էդուարդ Թոփչյանը: Այս համերգի մուտքը ազատ կլինի բոլորի համար: Ապրիլի 30-ին կայանալիք «Հայրենիք» խորագրով համերգը կկրի ցեղասպանություն ապրած եւ պատմական շատ արհավիրքներ անցած հայ ժողովրդի աննկուն կամքի, մեր հայրենիքի վերածննդի խորհուրդը: Համերգը կկայանա Գարեգին Բ Ամենայն հայոց կաթողիկոսի հովանավորությամբ եւ ՀՀ մշակույթի նախարարության աջակցությամբ: Կկատարվեն հայ մեծանուն կոմպոզիտոր Ալեքսանդր Հարությունյանի «Կանտատ հայրենիքի մասին», «Ասք հայ ժողովրդի մասին», «Հայրենիքիս հետ» ստեղծագործությունները: Կմասնակցեն նաեւ Հայաստանի ազգային ակադեմիական երգչախումբը եւ Հայաստանի փոքրիկ երգիչները, մենակատարներ` Դավիթ Բաբայանց, Գոհար Ազիզյան, Պերճ Քարազյան, Իրինա Զաքյան, Ռիչարդ Մադլենյան: Կասմունքի ՀՀ ժողովրդական արտիստ Արթուր Ութմազյանը: Հայկական թեմատիկայից դուրս, սակայն ոչ պակաս հետաքրքրական ու գեղեցիկ ծրագրով համերգ տեղի կունենա ապրիլի 19-ին: Կհնչեն Մոցարտի Դաշնամուրի թիվ 6 կոնցերտը, Հայդնի Կրկնակի կոնցերտը ջութակի, դաշնամուրի եւ լարային նվագախմբի համար (ջութակահարուհի Անուշ Նիկողոսյան) եւ Բրուքների 9-րդ սիմֆոնիան: Գերմանիայից կհյուրընկալվի հայտնի դաշնակահար Անդրեաս Ֆրյոլիխը: Հատկանշական է փաստը, որ Բրուքների այդ ստեղծագործությունը կատարելու նպատակով Գերմանիայից հատուկ բերվել են 4 Վագներյան տուբաներ: Վերջիններս ՀՊՖՆ-ին ժամանակավորապես տրամադրվել են Դրեզդենի Շտացկապել եւ Դրեզդենի ֆիլհարմոնիկ նվագախմբերի կողմից: | 
