ՀԱԿՈԲՅԱՆՆ ՈՒ ՍԱՐԳՍՅԱՆԸ ԳԼԽԱՎՈՐՈՒՄ ԵՆ ԱՂՅՈՒՍԱԿԸ Դուբայում ընթացող շախմատի շեյխի գավաթի խաղարկության 3-րդ տուրում Վլադիմիր Հակոբյանն ու Գաբրիել Սարգսյանը շարունակեցին հաղթարշավը: Հակոբյանը հաղթեց Պոնտուս Կառլսենին, Սարգսյանը պարտության մատնեց Սունդար Շյամին: Հայ շախմատիստները 11 մասնակիցների հետ 3 միավորով գլխավորում են աղյուսակը: Առաջատարների շարքում գտնվող Հովիկ Հայրապետյանի համար տուրն անհաջող էր: Նա առաջին պարտությունը կրեց Միխեիլ Մչեդլիշվիլու հետ պարտիայում: Հայրապետյանն ունի 2 միավոր: Հաջող է հանդես գալիս Տիգրան Պետրոսյանը, որը սեւերով հաղթեց Սթիվեն Յապին ու վաստակեց 2,5 միավոր: Լիլիթ Գալոյանը մրցաշարում 2-րդ հաղթանակը տոնեց Հայել Մոհդի հետ մրցավեճում: Լիլիթն ունի 2 միավոր: 2-րդ անընդմեջ հաղթանակը տոնեց Մարկ Բասենչյանը, որի մրցակիցը Էրվին Դիմարուկուտն էր: Մարկը եւս վաստակեց 2 միավոր: | 
