ԱՎԱԳԱՆՈՒ ԱՆԵԼԻՔՆԵՐԸ ԻՆԳԱ ՊԵՏՐՈՍՅԱՆ Միասեռականների քրեականացումից մինչեւ բյուջեի թափանցիկություն Երեւանի ավագանու թեկնածուները երեկ «Մեդիա կենտրոնում» քննարկեցին Երեւանի բյուջեին կապված իրենց ծրագրերը, մասնավորապես, թե ինչպես ավելացնեն Երեւանի բյուջեն: Ըստ պաշտոնական տվյալների` Երեւանի բյուջեն կազմում է 65 միլիարդ դրամ, որն ավելացնելու ուղղությամբ ամեն կուսակցություն ու թեկնածու առաջարկում են իրենց ծրագրերն ու դիտարկումները: «Բարգավաճ Հայաստանից» Պողոս Փլավչյանը նշում է, որ պետք է ապահովել լուրջ համագործակցություն մասնավոր սեկտորի հետ ու նրանից եւս ակնկալել ներդրումներ: ՀՀԿ-ից Վահե Նիկոյանը նույնպես կողմ է մասնավոր սեկտորի ու համայնքների միջեւ համագործակցությանը. «Մայրաքաղաքում անցյալ տարի կառուցված վերգետնյա անցումները հենց մասնավոր սեկտորի ու համայնքների համագործակցության հետեւանքն են, ու մեր համագործակցությունը շարունակական կլինի»: Իսկ ՀՅԴ-ից Արծվիկ Մինասյանը ասում է, որ իրենց կուսակցությունը նախատեսում է առաջիկա 4 տարիներին Երեւանի բյուջեն հասցնել մինչեւ 400 միլիարդ դրամի, դրան հասնելու ուղիներից մեկն էլ, ըստ Արծվիկ Մինասյանի, այն է, որ Երեւանում ստացված եկամտահարկերի ու շահութահարկերի 30 տոկոսը գնա Երեւանի բյուջե: Բացի դրանից` Արծվիկ Մինասյանը գտնում է, որ Երեւանի ավագանին պետք է իրականացնի հսկողություն բյուջեի կատարման նկատմամբ. «Եվ ակնկալում ենք, որ վերահսկողությունը վստահվի ընդդիամադիր ուժերին»: Օրինակ` «Երեւան հիմնադրամը», ըստ Արծվիկ Մինասյանի, փակ կառույց է, ու ոչ մի տեղ քաղաքացին չի կարող գտնել դրա հաշվետվությունը: Ընդհանրապես, քաղաքային բյուջեն, վերջինիս խոսքով, կատարվում է թափանցիկության նվազագույն պայմաններում: Բյուջեի կատարման արդյունավետությունը թափանցիկ դարձնելուն կողմնակից է նաեւ «Բարեւ, Երեւան» դաշինքի ավագանու թեկնածու Սիմոն Ղոնախչյանը , ըստ նրա` Երեւանում իրականացվում են ծրագրեր, որոնց արդյունավետությունը դժվար է գնահատել, հետեւաբար անհրաժեշտ է անցնել ծրագրային բյուջետավորման: «Նաեւ կարեւոր է, որ ավագանին քաղաքական գնահատականներ տա բյուջեի կատարմանը: Սակայն Երեւանի 2012-ի բյուջեի կատարմանը քաղաքական գնահատական չի տրվել», ասում է Սիմոն Ղոնախչյանը: Երեւանի բյուջեն ավելացնելուն ուղղված տարբերակներ առաջարկեց նաեւ «Առաքելություն» կուսակցության թեկանածու Մեսրոպ Առաքելյանը: Տարբերակներից մեկն էլ համատիրությունների համակարգի վերացումն է, քանի որ, ըստ Մեսրոպ Առաքելյանի , համատիրություններն աշխատում են անարդյունավետ. այսինքն` Երեւանի բյուջեն կարելի է ավելացնել այն գումարով, որը համատիրությունները հավաքում են բնակիչներից, սակայն չեն ծառայեցնում հօգուտ բնակիչների: Քննարկմանը հրավիրված էին նաեւ «Այլընտրանք» հետազոտական կենտրոնի ղեկավար Թաթուլ Մանասերյանը եւ «Համայնքների ֆինանսիստների միավորման» նախագահ Վահան Մովսիսյանը: Թաթուլ Մանասերյանը թեկնածուներին ուղղված իր հարցերում շեշտը դրեց քաղաքի անհամաչափ զարգացման, տարիներ շարունակ ապօրինաբար ձգձգվող շինարարությունների ու Երեւանի քաղաքապետարանին հարող զբոսայգում պտտվող միասեռականների հարցերի վրա: Թաթուլ Մանասերյանին հետաքրքրում են, թե ավագանու թեկնածուներն ի՞նչ լուծումներ են նախատեսում այս հարցերի համար: ՕԵԿ թեկնածու Ջուլիետա Թադեւոսյանը , որի կարծիքով համատիրությունները կարող են շատ հարցեր լուծել, սակայն դրանց գործառույթները ճիշտ չեն կատարվում, ասում է` բնակիչներից վերցված գումարով համատիրությունները կարող են լուծել շենքերի շրջակայքի լուսավորման հարցը: Իսկ ձգձգվող շինարարությունների վերաբերյալ Պողոս Փլավչյանը նշում է, որ դա պետք է կարգավորվի համապատասխան օրենսդրությամբ ու կառուցողների հանդեպ տույժեր ու տուգանքներ սահմանելով, ինչի հաշվին եւս հնարավոր է ավելացնել մայրաքաղաքի բյուջեն: Իսկ համաչափ զարգացման վերաբերյալ Սիմոն Ղոնախչյանը նշում է` որոշակի նախարարություններ, մշակութային օջախներ եւ ակտիվ գործող այլ կառույցներ պետք է տեղափոխվեն կամ բացվեն Կենտրոնից բացի նաեւ մյուս վարչական շրջաններում: Ինչ վերաբերում է միասեռականների հարցին, ապա «Առաքելության» թեկնածուն հավելում է` որքան էլ ազատամիտ գաղափարներով առաջնորդվի իրենց կուսակցությունը, իրենք կողմ են միասեռականների քրեականացմանը: | 
