«ՇԱԽՏՅՈՐՆ» ԱՌԱՆՑ ՄԽԻԹԱՐՅԱՆԻ ԿԻՍԱԵԶՐԱՓԱԿԻՉԻ ՈՒՂԵԳԻՐ ՆՎԱՃԵՑ Դոնեցկի «Շախտյորը», որը գործնականում արդեն ապահովել է չեմպիոնի տիտղոսը, հաջողությամբ պայքար է մղում նաեւ Ուկրաինայի գավաթի համար: Միրչա Լուչեսկուի սաները քառորդ եզրափակիչում սեփական հարկի տակ 2-1 հաշվով հաղթեցին «Կարպատներին» ու մտան հաջորդ փուլ: Այդ խաղում թիմի գլխավոր մարզիչը Մխիթարյանին հանգստանալու հնարավորություն էր ընձեռել, որն այդպես էլ մնաց պահեստայինների նստարանին: Իհարկե, դրան նպաստեց նաեւ հանդիպման ընթացքը: Արդեն առաջին խաղակեսում Գայն ու Տեյշեյրան 2 անգամ գրավեցին «Կարպատների» դարպասը: Հյուրերը միայն 79-րդ րոպեին 11 մ հարվածով կրճատեցին հաշիվը: Գավաթի մրցաշարում «Շախտյորի» գլխավոր մրցակիցն, անկասկած, կլինի «Դնեպրը», որը հյուրընկալվելիս 2-0 հաշվով հաղթեց «Վոլինին»: «Չեռնոմորեցի» ֆուտբոլիստներն էլ Կիեւում 2-1 հաշվով պարտության մատնեցին տեղի «Արսենալին»: Իսկ ահա «Սեւաստոպոլի» եւ «Տավրիայի» մրցավեճի ելքը որոշեցին 11 մ հարվածները: Խաղի հիմնական եւ լրացուցիչ ժամանակում գրանցվեց ոչ-ոքիՙ 1-1: 11մ հարվածաշարն ավելի դիպուկ իրացրին դաշտի տերերը, որոնք էլ կշարունակեն պայքարն Ուկրաինայի գավաթի համար: | 
